Inter Milan chakna Martinez

Lautaro Martinez chuan Inter Milan tan mamawh chhanna a nihzia a takin a lantir leh ta - Argentine striker hian Slavia Prague lakah goal hnih khungin Inter hi 3-0 in a chakpui.

San Siro-a inkhelah mualneitu lam hi a tir aṭangin an chungnung, captain Martinez-a'n goal hnih a khung karlakah defender Denzel Dumfries chuan a khung bawk; Champions League an match hmasa zawkah Ajax chu 2-0 in an lo hneh tawh bawk.

Martinez hian Slavia goalkeeper Jindrich Stanek tihsual a nangching, a ball pet chhuah tur chu zawitein Martinez hmaah a pet keuh a, ani hian goal ruakah nuamsa takin a khung.

Dumfries-a'n goal a khung theih nan Marcus Thuram a thawhhlawk, box chhungah ball luh puiin defender a paltlang hnuah a laia awm Dumfries tan a siamsak, ani hian hnai tak aṭangin an goal hnihna a lo khung a ni.

Inter Milan hian an duhtawk mai lo, second half-ah Martinez hian Alessandro Bastoni siamsak chu a khung leh a, awmna tur hmun dika a awm vang a ni, goal an khung dawna Inter player te ball inpekual a hmuhnawm hle.

European Cup/Champions League huangah tun hmain Julio Cruz chuan Inter Milan tan a zawnin season ruk chhung goal khat aia tam a khung a, tunah chuan he record duhawm tak hi Martinez chuan a rawn khum ta chiah, season sarih a kaltluang tawh a ni.

Inter head coach Cristian Chivu chuan, "Inkhel zawng zawng hi kan ngaipawimawh vek, tun ṭumah pawh khan a tir aṭangin hnehna chan ngei tumin kan bei a, a tawpah chuan kan thawhrim rah kan seng.

"Match kan ngah chho leh dawn hle a, hetiang hunah hian insiksawi thiam a ngai. Serie A a hautak chho em em a, team ṭha hmachhawn tur an tam, chutiang karah pawh chuan nghet taka kan din theih nan kan bei zel dawn a ni," a ti.

Serie A table-ah Inter Milan hi pangana an ni mek a, champion a awlsam dawn lo - Inrinni zan hian Cremonese an lo mikhual chhunzawm leh nghal ang.