Tennis season a rei lutuk - Swiatek

Iga Swiatek chuan tennis season an hman ṭhin dan chu a rei lutuk a ti a, player tam takin kum tawp lamah tournament an duh angin an khel thei tawh lo ṭhin niin a sawi.

Grand Slam vawi ruk champion tawh Swiatek hian China Open a khel mek, a khingpui Camila Osorio chu hliam vangin a inkhel zo thei lo a, hah lutuk loin Swiatek hian last 16 a inhlangkai.

Polish nula Swiatek chuan, "Hliam leh vanduaina hi chu engtik lai pawha thleng thei a ni, ṭhenkhat erawh taksa hah rimtawng lutuk vanga thleng thei a ni ve bawk, eng hi nge a chhan ber chu hriat a ṭha hle.

"Ngun taka ngaihtuah chuan Grand Slam zawh hnu hian chawlh hahdam duh an tam a, kum tluana inkhel kan nih avangin season tawpah chuan taksa a lo chau lutuk tawh ṭhin, hliam neih a awlsam bawk.

"Ranking point kan ngaihtuah a ngai a, tournament bituk chin kan khel tling lo a nih chuan nghawng a nei bawk si, tuna kan kal dan hi chu player ṭhenkhat tan chuan harsatna thlentu a ni mek," tiin a sawi.

Tennis season khat hi January aṭangin an khel ṭan a, dan pangngai ang chuan December an thleng thuak ṭhin - December chawhnu lamah hi chuan season thar inbuatsaihna an neih ṭan a ngai leh tawh bawk a ni.