Japan Open-ah Alcaraz a champion

Carlos Alcaraz tan season duhawm a ni chhunzawm zel - Spanish star hian Thawhlehni zan khan Taylor Fritz hnehin Japan Open nomawi a chawi a, tournament khelh hmabak Shanghai Masters aṭang erawh chuan a inhnukdawk thung a ni.

Tokyo khawpuia inkhelah, world number 1 Alcaraz tan harsatna lian tham a awm lo, a khingpui Fritz hi 6-4, 6-4 in a hneh, season kal laiah nomawi pariat lai a la tling ta chiah bawk.

Inelna an neih ṭan tirh khan Alcaraz hi a kerek vei lam a hliam a, tournament khel tluan mah se 100% dam chu a la ni lo; atan inelna hautak khelh chhunzawm chi a ni rih lo, a chawlh rih tur thu hi a sawi nghal a ni.

Kum 22 mi Alcaraz chuan, "Ka tan chuan season ṭha leh duhawm ber chu a ni chiang mai, final vawi 10 lut tawhin, chung zinga pariatah chuan ka hlawhtling, ka thil tum tihhlawhtlinna kawngah ka kaltluang hle.

"Season tirah tak kha chuan ka che ṭha nghal mai bik lo, a hnua ka insiamṭhat dan erawh thil lawmawm tak a ni thung. Hetiang ang taka ka khelh theih nan hian coaching staff puihna ka dawng ṭha," tiin a sawi.

Wimbledon an khelh ṭum khan final-ah Alcaraz hian Jannik Sinner a hneh lo, a hnuah erawh Cincinnati Masters 1000, US Open leh Tokyo Open nomawi te a zawnin a la thei a, a tan chuan season tawp lam duhthusam ang mai a ni.

Japan Open champion a nih hnu lawkah Alcaraz chuan, "Ka taksa dinhmun ngun takin kan ngaihtuah a, ka team leh damdawi lam thiamte nen kan sawi ho hnuah chawlh rih chu ka tana ṭha ber turah kan ngai.

"Theih ni se la chuang Sanghai Masters khelh ngei ka châk, min thlawptu tam tak an awm tih pawh ka hria. Season tharah chuan Chinese mipui nen pawh kan inhmuh theih ngei ka beisei," tiin a sawi.