Volleyball inelna lian an khel ṭan

Mizoram pum huap volleyball inelna - GIG Motors Inter Village Volleyball Tournament 2025 chu nimin aṭang khan khelh ṭan a ni a, vawiin hian R. Dengṭhuama Indoor Stadium, Mualpuiah khelh chhunzawm leh a ni ang.

Nimin inkhelah, volleyball thiam tia hriat hlawh Khawhai chuan Zonuam chu 3-0 in an hneh nghal. Aizawl khawpui chhunga awm Ainawm Veng pawh Sengsur lakah set la miah loin an chak lo nghal bawk.

Result kan hriat hman chinah North Vanlaiphai VC II leh Khuangleng te an chak. Pro Volleyball League lama team nei thei Electric Veng chu Khuangleng lakah hian 3-0 in an tlawm a ni.

Mizoram Volleyball Association (MVA) buatsaihin - GIG Motors Inter VC/LC Volleyball Tournament 2025-ah hian mipa team 64 leh hmeichhe team 14 an vaiin 78 an inlan dawn a, inelna hi knockout hmanga neih niin Ocotber 10-ah a hmawr bawk a ni ang.

Player ten an vote neihna hmunah an khel a, vote la nei lote chu Aadhaar card hmanga endik an ni ang. Inkhelh hun apiangin ID/Aadhaar ken zel tur a ni a, keng lo tan khelh theih a ni lo. Vote neihna hi kum 2025 January 1 hnu lama sawnte pawm a ni lo bawk.