Hma hun sawi chiang duh lo Bernardo Silva

Season tawp ruala a contract hmang zo mai tur, Manchester City captain Bernardo Silva chuan a hma hun a sawi chiang duh lo a, "Tuna sawi a la hun rih lo," a ti.

Kum 31 mi midfielder chuan, "Ka contract zawh hunah eng nge ka tih dawn tihah ka chiang em em a, mahse, tun hi sawi hun a la ni rih lo," a ti - Portuguese midfielder hi Benfica leh Juventus ten lakluh an duh niin khawthlang media-te chuan an tarlang.

Silva hian City captain armband hreng mekin, Kevin de Bruyne a thlak a, KDB hian a contract zawh ruala Etihad Stadium chhuahsanin, Napoli tan a khel mek.

City boss Pep Guardiola chuan, "Silva aia captain ṭha zawk an awm chuang lo. Training-naah a tiṭha ber a ni reng a, a fingin, a thluak a fim em em bawk. Position hrang hrangah a khel thei bawk a, ani ang kan nei thei hi kan lawm hle a ni," a ti.

Silva hian kum 2017 khan AS Monaco aṭangin Manchester City hi a pan a, match 412 khelhsakin, goal 72 a khung tawh a, assist vawi 74 a nei bawk.

Premier League-ah ringawt City hi vawi ruk champion pui tawhin, FA Cup (2), League Cup (4), FA Community Shield (3), UEFA Champions League leh FIFA Club World Cup-ah te champion nomawi a chawipui tawh bawk a ni.

Manchester City hian nizan khan Silva club hlui AS Monaco chu Champions League-ah an hmachhawn a, an result kan hre hman lo.