Liverpool keeper Alisson a inhliam

Galatasaray khelmualah Liverpool an tlawm a ni satliah lo - hliam vangin keeper Alisson leh Hugo Ekitike te lakchhuah an ngai a, Reds tan Istanbual inkhel zet chu mangchhia a ni ber!

Goalkeeper ṭhami Alisson hian Victor Osimhen-a khung ngei tur nia lang ṭha zeta a dan hnu, minute 56-naah khelmual a chhuahsan a ṭul a, Giorgi Mamardashvili chuan Brazil international keeper hi a thlak.

Liverpool boss Arne Slot chuan, "Ka player-te na ti taka khelmuala an tluk tawh hi chuan ka hlauthawng ṭhin hle. Thil lawmawm lo tak a ni a, Chelsea kan lenchilh hunah Alisson hi a inlan theih ka ring lo," a ti.

Alisson hian hliam vangin season hmasa khan league match 10 zet chu a lo khel lo tawh bawk a, he thu buatsaih a nih lai hian a hliam hi eng ang taka na nge a nih a la chiang lo.

Kum 32 mi Alisson-a'n Chelsea chu a hmachhawn dawn lo chiang phawt a, Valencia aṭanga pound maktaduai 29-a Liverpool pantu Mamardashvili tan Premier League-a inkhel bul a ṭan hmasak ber tur a ni ang.

Hetihlai hian Ekitike dinhmun a chiang lo bawk. Slot chuan, "Hliam tia sawi hluai theih a ni lo mai thei a, mahse, Hugo khan nawm lohna a neih avangin lakchhuah a ngai. Kartawpa a dinhmun tur chu kan la hria ang chu," a ti a, he thu buatsaih a nih lai hian a dinhmun chiang taka sawi theih a la ni lo.