Stamford Bridge-ah Mourinho a 'tlawm'

Chelsea manager ropui Jose Mourinho chu Benfica coach ni chungin a club hlui khelmualah a kir a, Blues ṭantuten ropuina rama hlangkaitu coach hi lawm takin lo lawm mah se, khelmualah erawh a chungah zahngaihna lantir a ni lo - Blues hian 1-0 in Benfica an lo hneh.

Stamford Bridge inkhela goal awmchhun hi minute 18-naa lut a ni a, Benfica midfielder Richard Rios chuan Alejandro Garnacho-a cross aṭanga ball kal chu an lamah a tilut a, 1-0 a Chelsea chakna goal a ni zui.

Chelsea hi Benfica an mikhual hmaa inelna hrang hranga an match hnuhnung pangaah vawi khat chiah an chak a, an hneh awmchhun pawh League One club Lincoln City niin, 2-1 in an chak hram.

Brentford (2-2) inhnehtawkpuiin, Bayern Munich (3-1), Manchester United (2-1) leh Brighton & Hove Albion (3-1) lakah an tlawm a, coach Enzo Maresca chu board-in an la thlawp tlat thu sawi thawm a awm phah hial - an dinhmun a derthawn loh chuan board-in an thlawp thu sawi a ni ngai lo!

Hetiang boruak karah hian Benfica an lo mikhual a, inkhel hmuhnawm lo tak ni mah se, Blues-in an beisei result an hlawh chhuak a, Inrinni zanah Liverpool an mikhual zui dawn avangin Benfica hneh hi an tan a pawimawh.

Hetihrual hian striker Joao Pedro chu yellow card pahnih a hmuh avangin hnawhchhuah a ni a, an match hnuhnung palia red card an hmuh vawi thumna a ni - Pedro hnawhchhuah hun erawh hun pek belh a ni tawh a, Chelsea an vannei.

Blues coach Enzo Maresca tan a naute nungchang her rem hret a ngai tih erawh a lang a, Benfica laka an khelh dan en erawh chuan an lakah beiseina tihsan a harsa rih!

Maresca chuan, "Ka nauten theihtawp an chhuah a, second half ai chuan first half-ah khan kan khel ṭha zawkin ka hria. Tun hnai kan match pahnih/pathumah goal hnih emaw goal thum emaw kan chhuah zel a, hma kan sawn a ngai - zaninah chuan goal kan chhuah lo e," a ti a, a naute khelh danah a lungawi.