Vanneihna mamawh Spurs

Tottenham Hotspur-in Champions League match-ah Bodo/Glimt lenchilhin, 2-2 in an inhnehtawk - chak ngei tura ngaih Spurs an chak zo lo a, a vannei zawk an ni hial!

Norwegian club hian inkhel ṭantir aṭangin Spurs an ngam a, first half-ah penalty an hlawh chhuak hial. Mahse, Kasper Hogh chuan penalty hi a hlah a, Spurs an harh phah chuang lo.

Second half-ah Jens Petter Hauge chuan goal hnih khungin, mualneitu club hi 2-0 in hma a hruaipui a, an khelmuala artificial grass hmangtu Bodo/Glimt lakah Spurs an mualpho dawn niin a lang hman.

Mahse, a tawpah Spurs an vannei - minute 68-naah Micky van de Ven chuan London club tan si phurh a sut ṭhen a, hun tawp nan minute khat chiah a awm tawh tihah Jostein Gundersen chuan an lamah tilut zuiin, Spurs hian si phurh an sut zo daih!

London club-in season hmasa Europa League nomawi an chawi ṭuma home & away-a an hneh Bodø/Glimt laka point hlawh chhuak turin vanneihna an mamawh a, Thomas Frank leh a naute tan inenfiah a ngai.

Spurs hian an league match hnuhnung pahnihah Brighton & Hove Albion (2-2) leh Wolverhampton Wanderers (1-1) an inhnehtawkpui a, tunah Bodo/Glimt an draw leh ta - Inrinni tlai dar 5:00-ah Leeds United an lenchilh zui ang.