A bul ṭanna Police Vs Saikhamakawn

GIG Motors MPL12 chu vawiin aṭangin Lawngtlai CYLA Ground-ah khelh ṭan a ni dawn a, chhun dar 12:00 hian match hmasa berah Mizoram Police leh Saikhamakawn te an inkhel dawn. Police hi MPL awm hmaa tualchhung football-a sulhnu ṭha ber an ni a, Saikhamakawn erawh kumin aṭanga Mizoram top flight football khel ṭan ve chauh an ni.

Mahse, Saikhamakawn hi MPL-a sulhnu nei ṭha ber coach Lalsangzuala Hmar enkawl a ni a, semifinal khel pha tura ngaih niin Police erawh relegate thei dinhmunah an ding. Lawngtlai mipui tan Police ṭha zawka tura rin nghal nghawt kha a fuh dawn lo.

RG Stadium-ah Saikhamakawn hian Police hi 5-0 in an sawp a, Suanngaihmuana leh Lalnunzira Sailo ten goal hnih ve ve an khung bakah Francis Malsawmkima'n goal khat a khung bawk. Coach Sanga hote hian Mizoram aiawh pawha feh chhuak tawh Melbuk forward Lallawmsanga (Lsa) leh Salem Veng stiker David Lalchhuanawma te an la lut a, tlarhma a chak ṭha sawt dawn.

Lsa leh David te hian team training an zawmna a rei tawh a, mah se document fel lawk loh vangin inkhel turin ni 30 an nghak. Player pahnih hi inkhel châkin an tuihal a rinawm a, mah se tlarhmaah Amuana leh Zira te an awm avangin bench-ah an ṭhut phawt a rinawm zawk. Amuana hi Mizoram striker ṭha Malsawmfela leh F. Lalrinpuia (Valpuia) te thlak thei tura theihna nei a ni a, MPL12-ah goal sarih a khung tawh.

Mahse, Police hi MPL10-a champion puitu Lalbiaksanga Colney-in a ho leh tawh dawn a, BS-a hi mit lama harsatna a neih avangin inelna ṭantirh lamah a naute a ho hman lo. BS-a hming a rik chiah hian inkhel en a châkawm sawt a, Saikhamakawn coach Sanga nen hian rilvary nung ṭha tak an nei tih hriat a ṭha.

MPL11 semifinal-ah pawh BS-a hoin Police hian Sanga enkawl Chanmari an hneh a, final an lut. Chutihrualin kumin CYMA Football-ah khan Sanga enkawl Republic Vengin BS-a enkawl BVT hnehin nomawi an chawi thung. Mizo coach ṭha BS-a chuan, "Semifinal luh theihna kawng a la inhawng," tiin Vanglaini a hrilh a, relegate lam a rilruah a la awm lo.

BS-a hian Sawmfela leh Valpuia bakah Lalfakzuala, Lalbiakhlua (Biaktea), R. Malsawmtluanga, H. Lalbiakthanga, Lalhmunmawia (Ahmuntea) leh F. Lalmuanawma te a nei a; heng player-te hi Mizoram rinrawl ni ṭhin vek niin Saikhamakawn hi an tha a khur eih lo ang tih hriat a ṭha. Lawngtlai mipuiin match hmasa ber aṭangin football hmuhnawm an thlir nghal dawn.