Atletico Madrid lakah Real Madrid an zawr

Real Madrid chu zahna kawnah an ding - anmahni ang bawka Madrid khawpuia inbengbel Atletico Madrid lakah Xabi Alonso leh a naute hi 5-2 in an chak lo a, nizana Barcelona inkhel result a zirin La Liga hmahruaitu an nihna an hloh nghal thei dawn a ni.

Inrinni zan Riyadh Air Metropolitano-a inkhelah, mualneitu Atletico tan Robin le Normand chuan hnai tak aṭanga tauh lutin hma an hruai a, an lawm chhung erawh a rei lutuk hman lo thung.

Diego Simeone-a nau te an muthlu zeuh a, defender inkara rawn dawk chhuak Kylian Mabppe chuan chiang lutukin si phurh a sur a, a hnuah Arda Guler chuan Vinicius Junior siamsak khungin hma an hruai let daih.

Chawlhlawk hma chiahin Alexander Sorloth chuan a Atletico Madrid hmahruai vawi hnih nan a khung a, second half chu an chan a ni chhunzawm bawk - Julian Alvarez-a penalty leh freekick mawi kan hmu.

Atletico Madird hian an duhtawk mai lo, counter attack hmangin an vawlet. Álex Baena-a ball lirh luh chu Antoine Griezmann tan khung nuam tawk a ni a, goalkeeper Thibaut Courtois tan lo dan ngaihna a awm tawh lo.

Madrid khawpuia awm pahnih zingah Real Madrid hi an lian fal a, an pahnih intawnah pawh sulhnu an nei ṭha zawk - tunah erawh an beisei ngam lo thil a thleng, kum 75 bawr vel hnuah Atletico Madrid lakah goal nga an chhuah a ni.

Atletico Madrid manager Diego Simeone chuan, "Real Madrid hi khawvela club ṭha berte zinga mi an ni a, an lakah hetianga hnehna kan chang thei a nih chuan kan khel ṭha tlang hle tihna a ni a, player zawng zawng an khel ṭha vek.

"Nico Gonzalez, Pablo Barrios, Julian Alvarez leh Giuliano Simeone te khan Real Madrid goal an nawr na hle, an hming lam vek sen pawh a ni lo. Tlarhung lamin khawvela forward hlauhawm ber ber te an veng thei te kha a lawmawm lai chu a ni," a ti.

Atletico Madrid hian season bul an ṭan fuh tawk lo a, sawisel pawh an hlawh. Tun hnaiah erawh insiamṭha in hma lam an pan - La Liga match sarih an khelh aṭangin point 12 an hmu a, table-ah palina dinhmun an luah mek.

Real Madrid tan erawh mualphona a ni - La Liga bikah goal nga an chhuah hnuhnun ber chu kum 2018 October kha niin Barcelona lakah 5-1 in an chak lo, coach thar Alonso naute an chak lohna hmasa berah an mualpho chiang hle a ni.

Alonso chuan, "Chhuanlam siam tur kan nei lo, a tawi zawnga sawi chuan kan khel ṭha lo a ni ber mai. League kan khelh chhung a rei dawn, team ṭha hmachhawn chang a awm avangin khelh ṭhat reng theih a ni bik lo," a ti a, an tihsual an siamṭhat nghal tur thu a sawi bawk.