English football-in Rashford an hre nawn!

Nilaini zan khan St James' Park-ah Champions League khelh a ni a, Barcelona chuan 2-1 in Newcastle United an hneh - Catalan club tana goal khungtu chu Marcus Rashford a ni.

Aw ni e, i chhiar dik e - Barcelona chakna chu Lamine Yamal emaw Raphinha emaw ni loin, Manchester United duh loh Rashford a ni a, Ruben Amorim-a hman thiam loh kha Hansi Flick-a'n hman raw hriam berah a lo chhuah.

Rashford-a'n goal hnih a khung hnuah Anthony Gordon chuan Magpies tan si phurh a sut ṭhen a, mahse, English forward-in goal a khung hian minute 90 a ni tawh a, comeback-na hun a awm tawh lo.

Hei le Rashford

St James' Park-a inkhelah Newcastle-in chance duhawm an nei hmasa zawk a, mahse, Anthony Elanga siamsak ṭha tak chu Harvey Barnes chuan goal-ah a chantir thei lo.

Magpies-in Catalan club laka chance neih chhawr loh pawizia an tem zui a, minute 58-naa Jules Kounde-a ball cross chu Rashford chuan ṭha zetin a tauh lut a, England boss Thomas Tuchel-a'n a hmunah inkhel hi a en.

Hetah hian a la tawp mai lo. Minute 67-naah a goal hmasa aia ṭha zawkin Rashford-a'n a khung belh a, a thiam a lo la theihnghilh hauh lo tih a pholang - Amorim, i lo en maw?

Barca an ṭha

Catalan club-in hliam vangin Lamine Yamal an chhawr thei lo a, mahse, tlarhmaah Rashford, Robert Lewandowski leh Raphinha an la inkawp thei a, bench aṭangin Dani Olmo leh Ferran Torres an la lut thei cheu!

Newcastle tan Barcelona an ṭha lutuk hret a, Eddie Howe-a'n Nick Woltemade aia a thlan Gordon-a'n goal khung ve bawk mah se, scoreline cheimawina bak a tling zo lo.

Catalan club hian Pathianni zan dar 12:30-ah league match an khel zui dawn a, Getafe an mikhual ang - tun season-a match li an khelh tawhah an la tlawm lo a, match thum chakin, match khat an draw tawh.