Asia Cup: Pathianniah India Vs Pakistan

Asia Cup group stage chu nizan khan khelh zawh a ni ta a, zanin aṭangin Super Four khelh zui nghal a ni dawn. Ram lian pali India, Pakistan, Sri Lanka leh Bangladesh ten final khel tur an zawng dawn a, Afghanistan tan hmun a awm ta lo.

Pathianni zan dar 8:00-ah India leh Pakistan an inhmachhawn dawn a, cricket ngainatute tan hmaih phal chi a ni lo.

Indo Pak II

India-in nizan khan Oman an hmachhawn a, result kan hre hman ta lo. Eng result pawh thleng se, Super Four khelh dan tur a ti danglam pha tawh lo a, inkhelh dan tur thlengin a chiang vek tawh. Men in Blue hian September 14, Pathianni khan Shaheens hi wicket sarihin an sawp tawh a, inkhelh result aiin Suryakumar Yadav leh a hoten Pakistan player an chibai duh lo chuan sawi zui a hlawh zawk.

Cricket inelna ni chung siin India leh Pakistan indona sawi rik ṭhat leh a ni a, Operation Sindoor thlengin sawi rik a ni. India tan Pakistan hneh nawn a ṭul a, final luh tura chak a pawimawh aia nasa mahin ram leh hnam tan chak a ṭul. Chutihrualin Pakistan tan pawh tlawm nawn a thiang lo a, stadium-ah chauh ni lo TV hmanga inkhel entu pawh an pung sawt tura rin a ni.

Team dang 2

Super Four match hnuhnung berah Sri Lanka-in (171/4) Afghanistan (169/8) chu wicket rukin an hneh a, group B-ah Lions-in khingpui hneh vekin pakhatna an ni. Result ngaichangtu Bangladesh tan chanchin lawmawm a ni a, Sri Lanka chak zarah Super Four an luh theih phah.

Zanin dar 8:00 hian Super Four-ah Sri Lanka leh Bangladesh te an inkhel dawn a, an intawn hmasak ṭumin Lions hian wicket ruk ngawtin Bangladesh hi an sawp. Sri Lanka hi chak tura rinkai ni mah se T20-ah chuan thilmak a thleng fo a, Bangladesh tan beisei tur a awm.