Messi hoin Inter Miami an chak

Lionel Messi chuan goal a khung bakah Jordi Alba tan a siamsak bawk a, a club Inter Miami chu Seattle lakah 3-1 in a chak pui - Major League Soccer (MLS) khelh laiah kawng dik an zawh.

Leagues Cup final-a an chak loh hnuah Inter Miami an insiamṭha a, an inkhel pawh a hmuhnawm leh ta. Minute 12-na lekah Messi hian Alba siamsakin hma an hruai hmasa phawt.

Chawlhlawk hma hretin Messi hian Alba siamsak chu a tlawh lut ve thung, second half-ah mikhual tan Obed Vargas chuan rawn sut ṭhen ve mah se Ian Fray chuan Inter Miami chak nemnghehna goal a khung ve leh ta a ni.

Inter Miami coach Javier Mascherano chuan, "Player hliam leh inkhel thei lo kan nei nual, chutiang chung pawh chuan point thum kan hlawh chhuak thei, a hman thei tur awm apiang hman thiam mai hi ka tih tur a ni ang.

"Kan hmabakah match pasarih a la awm, heng inkhelte hi kan tan chuan final ang vek a ni tawh a, final match pasarih khelh tur kan la nei tihna a ni," tiin a sawi a, a sang thei ang bera season khar a tum.

Inter Mimai hian 27 an khelh aṭanga point 49 hmuin pangana an ni mek - Club World Cup an khelh avangin midang aiin match thumin an la khel tlem bik, an hmabakah hian an chak vel a nih chuan hmahruaitu Philadelphia (57 points) chu an lehpel thei chiah dawn a ni.