Hmalam thlirtu Marquez

MotoGP champion ni tura dinhmun ṭha tawh tak Marc Marquez chu a hmawr bawk turin a inbuatsaih mek a, tunlai hian an team Ducati Lenovo chuan an hmasawn lehzual theih dan tur an ngaihtuah mek.

Bike intlansiakna season kal mekah, intlansiak paruk la awm mah se Marquez hian champion turin point thum chauh a mamawh tawh - September 28, Pathianni chawhma lam hian Japanese Grand Prix an tlan leh dawn a ni.

Season kal laia vawi 11 hnehna chang tawh Marquez chuan, "Kan team hian kan thawkrim em em a, tun season mai pawh ni loin season thar lo awm tur atan pawh ruahmanna hrang hrang kan nei der tawh.

"Thil eng emaw lai tih danglam zeuh zeuh a ngaih chang a awm a, team dang elphak ni tur chuan tun hun chauh ni loin nakin pawh kan ngaihtuah tel a ngai," tiin a sawi. MotoGP chauh ni loin car intlansiakna Formula 1 lamah pawh season thar ami tur an ngaihtuah lawk ṭhin.

Spanish rider Marquez hian kuminah a champion hma a nih pawhin inthlahdah a tum lo tih a sawi a, bike intlansiakna sang berah hian champion tam ber Valentino Rossi (7 titles) nih rual mai bakah, nakinah chuan khum ngei a tum tih a chiang.