Real Madrid chakpuitu Mbappe

Kylian Mbappe chuan penalty vawi hnih khungin Real Madrid a chhandam a, goal an phurh hmasak hnuah Olympique Marseille chu 2-1 a hnehin Champions League bul ṭan nan point thum an hmu.

Minute thumna lekah Trent Alexander-Arnold chu malpui hliam vanga lak chhuah a ngai a, amah thlak turin Dani Carvajal a rawn lut - Carvajal hi hun tawp dawnah hnawh chhuah a ni leh bawk.

Arda Guler-a'n ho lam taka a ball hloh an tuar; Mason Greenwood chuan a ball hmuh chu Timothy Weah tan a lir lut nghal a, ani hian goalkeeper Thibaut Courtois dan theih loh khawpa kawhin a pet lut pawp.

Xabi Alonso-a nauten si an phur rei lo, minute 28-naah Geoffrey Kondogbia chuan Rodrygo a tih tluk avangin penalty a chawi, a ettu Mbappe tan harsatna a awm lo, ball la nghalin goal dang khung belh a duhzia a lantir.

Carvajal an hnawh chhuah hnuah Real Madrid an hlauhzawm zui tho a, defender Facundo Medina chuan Vinicius Jr nen ball an inchuhna lakah a kutin ball a khawih palh a, penalty a chawi phah - Mbappe bawkin an chakna goal atan a khung zui a ni.

Real Madrid coach Xabi Alonso chuan, "Kan khel ṭha thawkhat hleah ka ngai, a bik takin kan kim loh hnua goal kan nawr leh inven dan kha a lawmawm. Player kim lo chunga Champions League-a hnehna chan chu thil ṭha a ni," tiin a sawi.

Season hmasa khan Real Madrid hian Mbappe hoin UCL final an lut phak lo. Tun season erawh chiu coach thar Alonso hoin beisei an nei sang a, a bul an ṭan ṭhat avangin inrintawkna an neih belh ngei bawk ang.