Police an tho chhuak thei ang em?

GIG Motors MPL12-ah vawiin tlai dar 3:00 hian Mizoram Police leh Dinthar FC te an inkhel dawn. Phase 1 khelh zawhah Police hi relegation zone-ah awm in Dinthar hi pathumnaah an awm thung. Maimawms hi an khelh tawh dan thlirin semifinal khel pha ngei tura ngaih an ni a, Police erawh relegate thei an ni.

MPL10 champion Police an talbuai a, relegate thei dinhmun aṭangin an tho chhuak thei ang em tih hi zawhna lian tak a ni ta. Tualchhung football hi Police tel lo chuan a kim lo a, anni hi chu sorkara hlawh la an nih bakah training-na hmun ṭha nei an nih avangin team ṭha bik tur an ni. Mahse, MPL12-ah erawh Police hi team naran an ni a, an inher rem fuh erawh chuan semifinal khelh beiseina an la nei pha thung.

Police hian an player lak tharte training vangin an chhawr thei lo a, an training zawh hmain MPL a zo hman dawn. Thuneitute lam an chet a ṭul a, MPL12-a an hman ṭangkai theih tur player C. Zohmingsanga, Isaak Malsawmkima, KC Larchhuakmawia leh Lalbuatsaiha te an lak chhuah theih pawimawh ang. Hei bakah hian September thlaa transfer hun la inhawn lai hian team tichak thei tur player naupang che rang an lak a ṭul bawk.

Chutihrualin an neih sa player-te hi an chhe lo, an ṭhat dan bera hman chhuah dan an zawn a ṭul thung. Goalkeeper F. Lalmuanawma bakah centre back Lalhmunmawia, midfielder H. Lalbiakthanga leh R. Malsawmtluanga lelh striker Malsawmfela te hi tun hnaia Mizoram player pawimawh vek an ni.

Kumin CYMA Football-ah F. Lalrinpuia'n Republic Veng a champion pui thei a, Armed Veng tan Lalfakzuala leh Lalbiakhlua (Biaktea) ten hmun pawimawh changin Electric Veng tan Lalbiakhlua (Biaktea) a la langsar ber bawk.

Kawnpui Vengtharin quarterfinal an thlen theih nan BT-a a langsar a, MS-a lah Chhinga Veng innghahna a ni pha. Armed Veng South-in semifinal an thlen theih nan Laldawngliana Colney, Lalnunsanga leh Laldinpuia te an pawimawh. Khawlailung lamah Lalthantluanga chu team khaipa ber a la ni bawk.

Heti taka hming langsar tamna an talbuai ta mai hi hriatthiam a har a, team enkawltuten an buaina tak an hriatfiah thuai a ṭul hle. Match hnuhnung bera Kanan a hmachhawn ṭuma an khelh danin Police dinhmun a ti chiang a, first half-ah goal ṭhahnem tak chhuah thei dinhmunah an ding a, second half-ah erawh eng team pawh hneh thei tur khawpin an khel ṭha thung. Police hian Kanan an hmachhawn ṭuma second half-a an khelh ang hi an chhunzawm thei a nih chuan Dinthar tan a awlsam lo ang.

Laldampuia kaihhruai Dinthar hian season bul ṭan ṭha mah se match hnuhnung berah Aizawl FC lakah goal nga ngawt an chhuah a, inrintawkna an hloh phah ngei ang. Chutihrualin Maimawms erawhin point 13 an hmu tawh a, table-a an dinhmun avang hian Police ang em emin pressure an ngah lo thung.