Hnehna nena bulṭan Kenin

Sofia Kenin chu tun season khuh hawn nan Abu Dhabi Open-ah a inlan a, a match hmasa pahnihah hnehna a chang nghal. Australian Open champion hian a match hmasa zawkah Yang Zhaoxuan 7-6 (4), 6-2 in a hneh.

Nimin khan second round-ah a inlan zui a, a khingpui Kirsten Flipkens lakah set khatna chu 7-5 in a hloh. American star hian set hnihnaah 5-4 in hma a hruai ve thung a, an khelh zawh hmaiin a khingpui hi hliam vangin a inlan chhunzawm thei lo.

Kum 22 mi Kenin chuan, "Hun rei tak chhung tournament kan khel lo a, chumi hnuah inkhelh leh chu a boruak a danglam hle. A nihna takah chuan a tir lamah khan ka khelh dan phung ka hloh.

"Mahse a rei hnuah chuan ka game pangngai kha ka khel chhuak thei. Match ṭhenkhatah hi chuan chak tur chuan vanneihna neih tel a ngai, tun inelnaah pawh hian ka vanneih zel ka beisei," a ti.

Inkhel dangah seeded palina Aryna Sabalenka chu set khatnaah 5-3 in hniam zawk hman mah se a khingpui Polona Hercog 7-6 (5), 6-2 in a hneh. Seeded parukna Elena Rybakina pawhin Lucrezia Stefanini chu 6-1, 6-3 in a hneh ve bawk.