Lakers-in White House tlawh dawn?

NBA champion Los Angeles Lakers chuan US president thar Joe Biden-a'n a office a luah hunah White House an tlawh a rinawm. White House an tlawh a nih chuan kum 2016 hnua NBA champion kal leh hmasa ber an ni ang.

Donald Trump khan tun hma deuhin NBA champion hi a office thlawh turin a lo sawm tawh, mahse player zingah Trump dodal leh tlawh chak lo thawm an awm avangin sawmna hi hnuhkir a ni - Trump hunlai khan eng team mahin White House an tlawh lo.

NBA champion hian an ram president chenna hi an tlawh ṭhin, tlawh hnuhnung ber chu Cleveland Cavaliers (2016) an ni. Obama hnuah Trump a rawn lal a, Golden State Warriors (2017 leh 2018) leh Toronto Raptors (2019) te chuan White House hi an tlawh lo a ni.

Champion lai Lakers hian nimin zing khan San Antonio Spurs an hmachhawn a, 118-109 in an chak lo. LeBron James awmna Lakers hi season kal laia vawi thum an chak lohna niin ṭum ruk an chak tawh thung.

Nimin zing inkhel dangah Philadelphia 76ers chu Brooklyn Nets lakah 122-109 in an chak lo. Eastern Conference hmahruaitu 76ers hian an player pawimawh Seth Curry chu coronavirus a kai avangin an chhawr thei lo a ni.