FA Cup Champion Arsenal hmaah Newcastle

Football tournament upa ber FA Cup third round-ah zanin hian champion lai Arsenal an inlan dawn. Mikel Arteta naute hian Emirates Stadium-ah Premier League club Newcastle United an mikhual ang.

December thla a intum tur an pawh lai kha chuan Newcastle tan Gunners hi huphurhawm an ni hran lo ang. Mahse tunah erawh North London club hi an harh leh tawh a, hmachawn châkawm an ni dawn lo.

Arteta-a'n season hmasa chawhnu lam aṭangin Arsenal a enkawl ṭan a, a bul ṭan kumah hian Chelsea hnehin FA Cup a chawi nghal. Amah ang bawka manager patuai Frank Lampard hneh chunga title lak kha a hlu zual lai chu a ni.

Spanish manager chuan, "Tun laiah chuan eng nomawi pawh nise lak a harsa vek, club ṭha kan tam avangin tournament zawng zawng hi a harsa vek mai a, hlawhtling tur chuan vanneih tel a ngai," a ti. An nomawi humhim tura teihtawp an chhuah tur thu a sawi bawk.

North London club hian FA Cup vawi 14 an la tawh a, champion lai leh record nei ṭha ber an nih avangin Newcastle lakah chak tura ngaih an ni a - chutih rualin knock out a nih avangin beisei loh result a thleng fo tih erawh hriat a ṭha.

Atletico Madrid aṭanga Arsenal zawmtu Thomas Partey a dam tawh a, training pangngai a neih tawh avangin zaninah a inlan a rinawm. Defender Gabriel erawh natna nei lo mah se Covid-19 inkaihhruaina vangin a la inlan thei dawn lo.

Arteta chuan, "Newcastle hmachhawn tura kan inbuatsaihnaah Thomas-a'n harsatna a nei tawh lo, ṭha leh rim takin training a nei thei tawh a ni. A rilru put hmang a dik bawk avangin mamawh hunah a inkhel thei tawh," a ti.

Ghana international midfielder hi beiseina sang tak nena lakluh a ni a, mahse hliam vangin a la inkhel tam tawk lo. December thla a Tottenham an ngam loh hnuah a la inkhel leh lo, zaninah a inlan a nih pawhin minute 90 chhung a khelh a la rinawm lo.

Zanin dar 8:30-ah Leicester City chu Stoke City mualah an lenglut dawn a, Foxes hian an striker hriam ber Jamie Vardy leh midfielder James Maddison te chu hliam vangin an chhawr theih a beiseiawm lo.

England international hlui Vardy hi chawn hliam vangin a buai fo a, a hliam hi a la dam fel lo. Maddison pawh Premier League a Newcastle an hneh ṭumin a khup a hliam a, a la dam fel loh avangin a chawlh a ngai.

Stoke hian EPL-ah tawh hriat an nei ṭha a, tun dinhmunah Championship club ni mah se Foxes tan player pawimawh pahnih tel lo chuan lenchilh chakawm lo tak an ni dawn. Brendan Rodgers tan fimkhur tak chunga player siksawi a ngai ang.