AC Milan chakna Modric

Luka Modric chuan a kum tam deuh tawh chung pawhin Serie A khel tlak a la nihzia chu a takin a lantir leh ta. Pathianni zan khan AC Milan chuan Bologna 1-0 in an hneh a, goal awmchhun hi Modric khung a ni.

Kum 40 Modric hian minute 61-naah Alexis Saelemaekers siamsak chu a khung, a club thar Milan tana a goal hmasa chu point thum hlawh chhuah nan an hmang nghal a, amah leh Milan tan a hlu zual khawp ang.

Croatian midfielder Modric hian Real Madrid tana hun a hman zawh hnuah, hahdam leh sum tam zawk hlawh theihna ni bawk aiin European football khelh chhunzawm a thlang a, a la ṭangkai thei hle.

AC Milan manager Max Allegri chuan, "Kan vanduai tluan ang tih kha a hlauhawm hman hle. Vawi li ngawt mai woodwork kan tihper a, chumi hnuah Luka khan min chhanhim hram chu a ni.

"Ball a hmuh khan a chiai miah lo a, tun hmain khatiang boruak kha chu vawi tam tak a lo hmachhawn tawh, keini lamin a ṭangkaina chu a takin kan chhawr ta chiah a ni," tiin Modric chu an tan a pawimawhzia a sawi.

Milan hian Serie A match thum aṭanga point ruk hmuin pangana an ni mek a, team ṭha Napoli leh Juventus te elphak an tum ang.