Marquez tan nomawi a hnai tazket ta

Marc Marquez chu a vawi sarih nan MotoGP champion a ni ngei dawn tiin a sawi ngam ta - Pathianni zana tlan zawh tak San Marino Grand Prix-ah a chak leh ber a, intlansiak an hmachhawn leh hunah chuan a champion fel thei tawh dawn a ni.

Misano World Circuit Marco Simoncelli tlankawnga intlansiakah, a tirah chuan Marc Marquez hi a hmasa ber nghal bik lo. Palina aṭanga bul ṭanin, a hnu rei vak loah Fabio Quartararo leh Alex Marquez te a tlanpel phawt.

Lap 12-na an tlan laiin Marquez hian a hmaa awm Marco Bezzecchi chu a tlan pel leh a, car intlansiakna sang berah hian a vawi 99 nan a chak a, tun season atan bik ṭum 11 lai mai hnehna a chang ta bawk.

Kum 32 mi Marquez chuan, "Duhthusam a thleng dik chho mek a, a tawp thlen hma erawh chuan rilru dang put a remchang lo. Tunlaia ka tlan ang tho hian kan hmabakah pawh ka tlan theih ngei ka beisei," a ti.

Spanish rider hian point 512 a hmu tawh a, intlansiak paruk hmabak la nei mah se amah hnaih bertu Alex-a aiin point 182 tehmeuhin a sang fal zawk a, champion tam ber Valentino Rossi a nih rual teuh tawh hle.

September 28, Pathianni chawhma lamah Japanese Grand Prix chu Twin Ring Motegi tlankawngah an tlan leh dawn, bike intlansiakna sang berah hian a vawi 100 nana chak chungin Marquez hian champion theihna remchang a nei dawn a ni.

Marquez hi rider ropui leh theihna nei sang bik a ni a, mahse a banruh tliak vangin hun rei tak chhung ngai a awh thei mai lo. Kuminah hian a champion thei a nih chuan kum 2019 hnua hlawhtlinna a chan lehna hmasa ber a ni ang.