PSG an la chak kim vek

Paris Saint Germain chuan Ligue 1 season bul an ṭan fuh an chhawmnung - Luis Enrique leh a naute hian Pathianni zan khan an mikhual Lens chu 2-0 in an hneh. Tun season league match pali an khelh tawh chinah an la chak vek a ni.

Paris khawpuiah PSG hi an vawk lal len mek a, anmahni ngamtu an awm lo. Lens lakah pawh Bradley Barcola chuan goal hnih a khung a, mikhual lamin a chhanletna tur an nei ve lo.

PSG coach Enrique chuan a ban ruh tliak an zai chu awrh chungin a naute a kaihruai. Enrique chuan, "Inkhelh hma khan thil pawi leh tihsual palh awm thei hrang hrang kan sawi ho a, a hunah tak ka naute khan an hna ṭheuh ṭha takin an hlen chhuak.

"Ligue 1 kan ngaipawimawh a, kan ngaihlu em em bawk. Kan hmaah Champions League khelh tur a awm bawk a, chumi nen chuan kan siamrem zel pawh a ngai, chutiang tur chuan kan squad pawh a chhah ṭha.

"Player pawimawh pathum an inhliam mek a, kan ṭhat dan ber erawh chuan kan khel thei rih lo. Kan dam kim loh chuan inkhelh dan pawh kan siksawi a ngai ṭhin a, hetiang hunah hian midang tan kawng a inhawng ve tihna a ni bawk," tiin a sawi.

Season hmasa khan PSG hian France rama nomawi chawi theih hrang hrang bakah Champions League title an la tel a, kuminah an nomawi kawl lai ho humhim an tum dawn - hna awlsam chu a ni dawn lo.

September 17, Nilaini zanlai hian tun season an UCL match hmasa ber an khel dawn a, an khelmual hman thiam Parc des Princes-ah Atalanta an lo mikhual ang.