Mizoram Online chess-a Pakhatna Hrangdailova

Mizoram Chess Association chuan December 28-29 chhung khan 2nd Mizoram Online Open Chess Tournament a buatsaih a, Lunglei mi Hrangdailova Hauhulh chuan point hmuh theih zat 12 aṭangin 10.5 hmuin a champion.

Online inelna hi mahni in lum aṭanga hmanraw hrang hrang – computer/laptop/mobile phone hmanga khelh a nih vangin Chess engine/software hmanga inbumna (cheating) awm thei hrang hrangte uluk taka kar khat chhung endik a nih hnuah result hi January 7, Ningani khan an puang.

Chess tournament hi khawvel pum huap Online Chess game khelhna lar ber pakhat Lichess.org aṭangin Blitz game (5min + 3sec., increment) Swiss system 12 Rounds a khelh a ni. 

Tournament-a tel zawng zawngte rating hi chawhrualin 1688 a ni a, game 1001 khelh a ni. Sa var (White) changtu 41% in hnehna an chanpui laiin, sa dum (Black) changtu 40% in an chakpui ve thung a, inhnehtawk hi 5% an awm bawk.

Inelnaah district 11 aṭangin mi 196 an tel a, Aizawl District Chess Association aṭangin mi 110 telin an tel tam ber a, Lunglei DCA leh Kolasib DCA aṭangin mi 14 ve ve telin an dawt a ni.