Barcelona an chak nuamsa

La Liga champion Barcelona-in an nomawi humhim an tum tih khelmualah an pholang a, an mikhual Valencia chu 6-0 ngawtin an sawp - Catalan club hi league match li an khelhah an la tlawm miah lo.

Hansi Flick-a naute hi vawi thum an chakna a ni a, vawi khat an khingpui an inhnehtawkpui bawk. Hetihlai hian an elpui Real Madrid erawh match li an khelh tawhah an la chak vek a, table chung ber an luah mek.

Pathianni zan inkhelah Barcelona tan Fermín López, Raphinha leh Robert Lewandowski ten goal hnih ṭheuh an khung a, mahse, Catalan club hian Nou Camp-ah match an la khelh theih loh avangin fans tam zawk nen chak an la lawm thei lo.

Barcelona hian an khelmual hmingthang Nou Camp hi an sa ṭha mek a, tun season-ah hman ṭan tura beisei ni mah se, phalna an la hmu hman lo! Barca B team khelhna, mipui 6,000 lenna Johan Cruyff Stadium-ah an inkhel.

A sur e!

Barcelona hian goal ruk ngawt khung mah se, first half chhungin goal khat chiah an khung. Minute 29-naah Fermin Lopez inlarin, Ferran Torres-a siamsak chu goal hmahruai ni turin a khung.

Catalan club-in 1-0 in chawlhlawk an hmang a, second half-ah Valencia-in comeback an beisei laiin, dawl zawrin an zawr. Minute 53-naah Marcus Rashford chuan Raphinha tan a siamsak a, Brazilian forward tan khung loh chi a ni lo.

Barca an phur tulh tulh - goal hmahruai pahnih khungtu Fermin Lopez leh Raphinha bawk inlarin, goal khat ve ve an khung leh a, minute 70 hmain 4-0 in hma an hruai der tawh.

Mahse, Catalan club hian an duhtawk mai lo. Kum 37 mi Robert Lewandowski chuan a la tar lo tih pholangin, goal hnih a rawn khung ve leh a, Barcelona an chak chiang hle.

Lawm lohna kara lawmna

Barca hian an stadium Nou Camp chu an sa ṭha mek a, mipui 100,000 leng turin an buatsaih. May 2023 aṭang khan an khelmual hmingthangah hian an khel leh tawh lo a, Olympic Stadium chu an khelmual atan an hawh ṭhin.

Barca hi November 2024-a Nou Camp-a kir tur an ni a, mahse, an hman lo. Tun season-ah pawh an home match hmasa ber hi Nou Camp-a khelh theih dan an ngaihtuahpui a, an match hmasa pathum chu khualmualah an khelhtir.

Mahse, Catalan club an la inpeih hman ta chuang lo a, an B team khelmualah an inlan a ngaih phah - hei vang hian Manchester United aṭanga loan-a an hawh Rashford pawhin Barca home match hmasa ber chu mipui 6000 lek hmaa a khelh a ngaih phah.

Rashford hian goal khung lo mah se, assist a nei a, minute 67 khelmualah hun hmangin a khel ṭha hle - tun hi Barca a pan hnua inkhel bul a ṭan vawi hnihna a ni a, goal khung lo mah se, a khelh danin inrintawkna thar a pe ang.