Champion zia chhuahtu Liverpool

Premier League match li khelh tawha chak vek thei team pakhat chiah an la awm a, an hming chu Liverpool a ni - EPL champion hian Burnley lakah point an hloh dawn emaw tih hnu, hun pek belhah penalty hmangin chakna goal an khung a, 1-0 in an chak.

Burnley khelmualah mualneitu team-in 'bus park' an thlan avangin Liverpool tan goal khung a harsa a, Turf Moor-ah point khata lungawi an zir mai dawn niin a lang hman.

Mahse, hun pek belhah Jeremie Frimpong-a ball cross chuan Burnley midfielder Hannibal Mejbri-a kut a per a, penalty an chawi. Mohamed Salah a lo pen chhuak a, Egyptian forward hian harsatna nei loin goal-ah a chantir a, Reds an chak leh ta.

Burnley hian minute ruk chauh a awm tawh tihah player kim loa an khelh a ngai a, Lesley Ugochukwu chuan Florian Wirtz laka a foul avangin a yellow card pahnihna a hmu - Alexis Mac Allister laka a chet dan avangin yellow card hmasa zawk hi a hmu.

Mac Allister hi second half-ah lakchhuah zui a ni a, mahse, Liverpool boss Arne Slot chuan ngaihtuahawm a nih loh thu sawiin, "International break-ah a inkhel chau bawk si a, inven nan ka la chhuak a ni," a ti.

Slot hian pound maktaduai 125 man, Newcastle United aṭanga a lakluh Alexander Isak chu squad-ah pawh a telh lo a, inkhel tlak turin chawlh hahdamna hun a la pe rih.

Liverpool hian Nilaini zan dar 12:30-ah Champions League match an khel lehnghal dawn a, Atletico Madrid chu Anfield-ah an mikhual ang.