India-in Pakistan an sawp

Pathianni zan khan Asia Cup-ah India-in an hmelma Pakistan chu wicket sarihin an sawp a, Suryakumar Yadav hoten an khingpui hi an chibai duh lo a, hei hian sawi zui a hlawh hle. Dubai-a inkhelah Pakistan-in bat hmasak thlangin 127/9 runs chauh an siam a, over 15.5 lekah India hian 131/3 runs siamin hnehna an chang.

Inkhelh ṭan hmain India captain Suryakumar Yadav leh Pakistan captain Salman Agha a chibai duh lo a, Men in Blue tana a tawp khartu SKY leh Shivam Dube ten Pakistan player-te chibai loin Pavillion an pan nghal bawk. Pakistan coach Zeaander Hesson chuan, "Inkhelh bana chibai turin kan inpeih a, mah se kan khingpuiten min chibai duh lo," tiin a sawi. Hemi vang hian inkhelh banah Shaheens captain Agha-a'n media a hmachhawn duh lo thung.

Inkhelh banah SKY-a'n Pakistan laka an rilru put hmang a sawi chiang. India captain chuan, "India tana thilpek kan pek ve theih a ni. Firfiakte beihna tuartu leh an chhungte kan hre reng a, kan inpumpkhatna lantirna a ni. Kan hnehna chan hi sipai huaisente tan kan hlan," tiin a sawi.

SKY chuan sawi chhunzawmin, "Kan sorkar leh BCCI thawhhona a ṭha a, kan thu a inhmu bawk. Thutlukna kan siam a, helai hmunah hian cricket khel tur chauhin kan lo kal. Keini chuan infiammi rilru aiin kan ram leh kan mipui kan dah pawimawh hmasa," a ti. April 22, 2025-a Pahalgam, Jammu & Kashmir-a firfiak beihna avangin India leh Pakistan an indo a, tunah indona reh tawh mah se thil thleng erawh theihnghilh a la ni lo.

India hian Pakistan an sawp avangin Super Four an lut tawh a, Shaheens pawh hian September 17, Nilaini zan dar 8:00-a UAE an hneh chuan group stage an paltlang dawn. Ram pahnih hi Super Four-ah an inkhelh leh ngei a rinawm a, group stage a thil thleng avang hian an intawn leh hun boruak chu nung ṭha khawp ang.