Relegation Battle : MLS FC Vs SYS FC

GIG Motors MPL12-ah vawiin tlai dar 3:00 hian relegation zone-a awm pahnih MLS FC leh SYS FC te an inkhel dawn. Lunglei club SYS hian tun inelnaah chak an la nei lo a, Lawngtlai club MLS hian vawi hnih chak tawh mah se relegation zone-ah an tla thla leh tawh. Team pahnih hi relegate tura rinkai an ni a, vawiina chak lo zawk tan MPL khelh zel a harsa ang.

MLS hi pasarihnaah awm mah se match hnuhnung berah player 10-a khel chungin Kanan FC 3-1 in an hneh. Lawngtlai club tan Freddy Lalrinkima a langsar a, goal hnih khungin goal ṭha ve ve a ni. Kanan an hneh zawh hian MLS hi panganaah an invawrh chho a, mahse nimin lamah Kanan leh Mizoram Police an inhnehtawk a, head to head-ah Police an tluk loh vangin pasarihnaah an tla thla.

Coach Vanlalpeka hoten inrintawkna an nei chho a, hrem vangin Ricky Zomuanzuala Khiangte an chhawr thei lo chungin SYS lakah pawh chak tura rinkai zawk an ni. Chututihrualin Lawngtlai club hi point thum hmu saa khelmual an luh erawh chuan chesual ve thei tho an ni thung.

SYS lam hian Police lakah point khat chauh an hmu a, match dang pangaah an chak lo vek. Lunglei club hian point khat chauh an la hmuh avangin relegate lo turin point thum hmuh a pawimawh tawh a, vawiina an khingpui tur hi an elpui an nih avangin chak tuma 'risk' an lak a ṭul ang. Team pahnih an inhlau dawn lo a, attacking football ve ve an khelh dawn avangin inkhel hmuhnawm viau tura ngaih a ni.