Dintharin Aizawl FC an el pha em?

GIG Motors MPL12-ah vawiin chhun dar 12:00 hian Aizawl FC leh Dinthar FC te an inkhel dawn a, champion rinkai pahnih inkhel tur a nih avangin inkhel a hmuhnawm ang. Maimawms hi round 6 zawhah pahnihna ni mah se I League club Chanmari an hneh lo a, vawiin chhunah I League club hlun zawk Aizawl FC lakah fiahna an hmachhawn dawn.

MPL hmasa ber champion Dinthar hian hliam vangin Jerry Lalchhanchhuaha an chhawr thei lo a, Maimawms an channa lian tak ni mah se bench-ah Lalkhawpuimawia te an daih thei a, a thlakna tur an kawl. Match hnuhnung berah kim loin SYS FC an sawp thei a, Aizawl FC lakah keeper Joel Lalramchhana te an rawn kir leh thei tawh ang. Lunglei club an sawp ṭumin R. Laldanmawia'n goal hnih a khung a, Aizawl FC-in an player hlui Sialhawk Express hi an ven uluk a ṭul dawn.

Aizawl FC lamin hrem vangin goal riat khung tawh Zomuansanga an chhawr thei dawn lo a, Khawbel tlangval hian match hnuhnung paliah goal a khung vek avangin Dinthar tlarhnung tan chuan a thawven thlak khawp ang. Mahse, R. Lalruatfela enkawl I League club hian an hmaa awm apiang hneh an duh a, team boruak a ṭhat bawk avangin Dinthar lakah chak tura rinkai zawk an ni ang.