Kanan lakah Police 'comeback' ropui

GIG Motors MPL12-ah nimin khan Kanan FC leh Mizoram Police an inkhel a, Chawngthansanga hoten half time-ah 3-1 a hmahruaiin Police an sawp dawn niin lang hman mah se 3-3 in inkhel a tawp. MPL10 champion tan Mizo striker pahnih Malsawmfela leh F. Lalrinpuia te an vul a, Police-in relegation zone an chhuahsan.

Nimin chhun inkhelah Police inkhel a nung lo. Kananin goal bawh a na nghal a, minute rukna lekah Lalthanpuia ball pet chu Police defender Lalhmunmawia'n tauh perin goal-ah a lut. Kananin goal chance an ngah a, keeper F. Lalmuanawma chet ṭhat zarah an khung tam lo. Chutihrualin Police keeper namchhuah ṭhat tawk loh vangin Joseph Lalṭhafela'n minute 20-naah Kanan goal hnihna a khung.

Goal hmaah Kanan an fimkhur tawk lo a, chance ṭha tur holam taka chhuah an ngah. Police lam erawh set piece-ah an ṭha reng a, minute 23-naah R. Malsawmtluanga corner kick pet ṭha chu B. Zoramthanga'n a tauh lut a, hliam angin B. Sena hi thlak a ngai nghal. Police tlarhnung a pawp zui a, F. Lallawmkima'n a club hlui lakah minute 38-naah a khung. Kananin first half-ah 3-1 in hma an hruai a, goal tam zawk an khung loh avangin Police-in beiseina an neih phah.

Police-in second half-ah F. Lalrinpuia an luhtir a, Police goal bawh a na sawt. First half-ah Malsawmfela reh deuh mah se minute 53-naah Police striker hian chance insiam chawpin goal ṭha bik a khung. Kanan tlarhnung tan Valpuia leh Sawmfela te inkawp buaina tham a tling a, chutihrualin Kanan pawh hian goal khung belh theihna chu an nei tho. Minute 85-naah Police an vannei a, Valpuia'n penalty hlawh chhuakin Police striker hian a penalty hlawhchhuah chu goal-ah a chantir a, 3-3 in inkhel a tawp.