Smith-a'n century a siam

Australia batsman Steve Smith chuan India nen Test match vawi thumna an khelh mekah century a siam. Kum 31 mi Smith hian England nen September 2019-a  fourth Ashes Test an khelh hnuah century a siam leh lawk a, thla 16 zet a nghah hnuah run 100 a vaw chhuak leh ta.

Third Test hi January 7 aṭang khan Sydney Cricket Ground-ah khelh ṭan a ni a, ṭhumvawra chak Australia-in an vuat hmasak an thlang.

Smith-a'n run 131 a siam bakah Marnus Labuschagne (91) leh opener Will Pucovski (62) te an che ṭha a, first innings-ah 338 an siam. India bowler zingah Ravindra Jadeja che ṭha berin wicket li lain run 62 a pe.

India hian nimin khan an bat chhunzawm ve nghal Rohit Sharma (26) leh Shubman Gill (50) ten bul an ṭan chhe lo a, Cheteshwar Pujara (9*) leh captain Ajinkya Rahane (5*) ten tukin zing aṭangin an bat chhunzawm leh dawn a ni.