I League khelh hun a inher chhuak ta Vawiin tlai dar 4-ah Aizawl FC vs Roundglass Punjab

Mizo club Aizawl FC telna India rama football inelna sang I League chu vawiin aṭangin Kolkata-ah khelh ṭan a ni dawn. Covid-19 vangin inelna hi Kolkata khawpuia stadium pathumah an khel ang a, 1Sports-ah a en theih ang.

I League match hmasa berah Kolkata club lar Mohammedan SC leh club thar Sudeva FC te vawiin tlai dar 2:00 hian Salt Lake Stadium-ah an inkhel ang a, tlai dar 4:00-ah Roundglass Punjab leh Aizawl FC te Kalyani Municipal Stadium-ah an inhmachhawn ang. 

Ni hmasa berah hian match thum a awm nghal dawn a, Gokulam Kerala leh Chennai City te zan dar 7:00-ah a tawp an khar ang. January 10, Pathianniah Real Kashmir leh Trau te tlai dar 4:00-ah an inkhel ang a, zan dar 7:00-ah Indian Arrows leh Churchill Brothers te an inkhel bawk ang.

Mizo coach Lalsangzuala Hmar a tel avangin ṭum dang zawng aiin Aizawl FC inkhel en a châkawm dawn. Sanga hian Chanmari FC leh Chhinga Veng FC te MPL-ah a champion pui tawh a, training zawng zawng a neihpui avangin Mizo pa thluak hmangin an khel dawn a tih theih.

Aizawl FC head coach hi Henry Stanley Rozario a ni a, Shillong Lajong coach hlui hian Aizawlah training a neihpui lo. Vanglaini thu dawn danin Standley hi Kolkata-ah a zin ve lo a, hemi a nih avang hian assistant coach Sanga hian hna pawimawh tak a chelh dawn.

Sanga pui tur hian Aizawl FC coach hlui Gosen Rammawia a awm a, Mizo team hi Mizo coach-ten an enkawl dawn niin a lang. Chutihrualin Aizawl FC hian foreigner pathum captain Alfred Kemah Jaryan, defender ṭha Richard Kasagga leh Princewill Emeka te an kawl. Nigerian forward Princewill hi Neroca leh Trau tana khel tawh a ni.

Aizawl FC hian Kolkata an pan hmain Covid-19 test an nei a, hri an kai lo vek. Kolkata-ah hian ṭum nga vel coronavirus test an nei leh tawh a, player zingah kai an awm lo. Chumi awmzia chu Mizo club hi an ṭhat theih dan berin an inlan thei dawn.

Defender Kassaga hian tlarhnung a ho ang a, Alfred-a'n midfield a pui ang a, Princewill Emeka hi hma tawnga awm tura ngaih a ni. A tlem berah Mizo pariat chu a la inlan dawn tihna a ni a, tute nge khel ang tih a hriat thiam a la har hle.

Goalkeeper pathum zingah tawnhriat nei ṭha ber Zothanmawia (T. Mawia) a inlan rin a ni a, tlarhnungah Samthang tlangval PC Laldinpuia chu Kassaga kawppui turin a rinawm ber. Dinpuia kawppui ṭhin Pukpui tlangval Vanlalzuidika Chhakchhuak hi mual sir lamah a sawn theih. Chutihrualin K. Lalmalsawma leh C. Lalrosanga ten bul an ṭan a nih pawhin a mak lo ang.

Midfield-ah Alfred kawppui turin R. Malsawmtluanga awm a, mual sir lamah East Bengal aṭangin Brandon VL Remdika an lalet a, winger ṭha mi H. Lalmuankima a la awm bawk. Chutihrualin Lalmuanzova, Ramhlunchhunga, David Laltansanga leh AIFF academy-a awm ṭhin B. Rohmingthanga te thlan tur an la awm avangin bul ṭan tur pawh rin thiam har tak a ni.

Tlarhmaah pakhat chauh emaw pahnih pawh hmang se Princewill Emeka chu chiang tura ngaih a ni a, a thawp tur hian F. Lalremsanga, Lalrammawia leh MC Malsawmzuala te an awm. Covid-19 vangin quarantine hmang rei leh rei lo an awm a, hei hian bul ṭan turah nghawng a nei ang.

Roundglass Punjab hian Minerva Punjab an thlak a, sum an ngah avangin player pawh an fawm ṭha hle. Season liam taa Mohun Bagan champion puitu Spanish midfielder Joseba Beitia an chang thei a, ani hi Real Sociedad aṭanga inzir chhuak nghat a ni.

Ronaldo of Bhutan an tih mai Chencho Gyeltshen an nei a, tlarhnungah Brazilian defender Danilo Quipapá an nei. Indian player-ah pawh hming langsar an awm nawk a, captain Bikramjit Singh hian sulhnu a nei ṭha tawh hle.

Punjab club hi Irish manager Curtis Fleming-a'n a ho dawn. Fleming chuan, "Club puitling angin bul kan ṭan chauh a, Aizawl FC erawhin khelh dan nghet an nei tawh. Chutihrualin keini pawhin tun inelnaah hian ṭha taka khelh tluan kan tum a ni," tiin a sawi. Punjab hian player 27 an nei a, player pathum an la ziaklut thei tihna a ni.

- Team 11 an inel dawn. Chungte chu Aizawl FC, Chennai City, Churchill Brothers, Gokulam Kerala, Indian Arrows, Mohammedan, Neroca, Punjab FC, Real Kashmir, Sudeva leh Trau te an ni.

- 2019-20 season aṭangin relegate an awm lo. Season liam ta kha Covid-19 vangin khelh zawh theih a ni ta lo a, Mohun Bagan erawh an point dinhmun a ṭhat tawh avangin champion-ah puan an ni ta tho. 

-  First phase-ah team tin hi vawi khat ṭheuh an inkhel chhuak ang. Second phase-ah team 11 hi group hnihah ṭhen an ni ang. 

- Group A-ah hian league table-a a sang paruk (6) team an awm ang. Group B-ah a hnuai lam team nga an awm thung ang.

- Group A team te hian champion tur an zawng ang. Group B team te hian relegate tur an zawng thung dawn.

- First phase leh second phase-a team tin te point hmuh hi belhkhawm a ni dawn. Hemi a nih avang hian second phase-ah ringawt innghah chi a ni lo a, first phase-a chet ṭhat a pawimawh tel dawn a ni.

Real Kashmir-in Mizo footballer langsar Lalrindika Ralte an lalut a, Mizo mipuiin an ngaihven phah ang. David Robertson hote hian I League match hmasa berah Pathianni tlai dar 2:00 hian Trau an hmachhawn dawn.

Snow Leopards hian Didika bakah hian Lalhmangaihsanga Ralte (Sena Ralte) an kawl a, North Mualcheng tlangval ho hian December thla khan IFA Shield-ah an champion. 

IFA Shield hi Kolkata-a khelh a nih avangin Real Kashmir hian I League atan inpuahchahna ṭha tak an nei tihna a ni a, champion tur hian I League kai thar Mohammedan SC chu semifinal-ah 4-0 zetin an sawp a ni.