Roma mikhual tur Inter Milan

Serie A season kal laiah fal taka kal fawr thei an awm lo. Pathianni tlai dar 5:00 hian pahnihna ni lai Inter Milan chu an hnuaia awm AS Roma mualah an lenglut dawn a, team pahnih inthlauhna hi point thum chauh a ni.

Hmahruaitu AC Milan pawh Juventus laka an chak loh avangin an dinhmun a nghet bik lo. Milan hian zanin dar 1:15-ah Torino an mikhual dawn, an chak a nih chuan an elpui Inter lakah an kal fal lailawk thei ang. Champion lai Juventus-in Pathianni zanah Sassuolo an hmachhawn thung ang.

Inter Milan hian an match hnuhnung berah Sampdoria 2-1 in an ngam lo a, manager Antonio Conte-a'n an chak loh chhan chu vanduai vang chauh niah a ngai, vanduai nawn a duh dawn lo.

Sampdoria lakah Romelu Lukaku a inlan lo. Belgium international striker hian hliam tenau a nei nia sawi a ni, a dinhmun endik a nih hnuah natna a nei lo a, league goal 12 khung tawh hi tun ṭumah chuan inlan thei tawh tura beisei a ni. 

Conte naute hian point hmuh an duh a nih chuan tlarhnung an venhim ṭhat a ngai dawn. Tun season bikah vawi khat chauh goal chhuah loa khelh an la nei, an khingpui tur Roma hi an match hnuhnung pangaah goal thum aia tlem lo khung vek an ni thung.

Paulo Fonseca enkawl Roma hian tun season Serie A match 16 an khelh chinah goal 35 an khung thei a, hmahruaitu Milan nen goal khung hnem an ni. An mikhual Inter lakah pawh attacking game hmuhnawm an chhawp chhuak leh tura ngaih a ni.

AC Milan striker Zlatan Ibrahimovic a dam tawh a, training nei tawh mah se zaninah a inlan ngei dawn em tih erawh a la chiang lo. Juventus nen an inkhelh dawn khan manager Stefano Pioli chuan, " A dinhmun a ṭha zel, Torino nen kan inkhelh dawnah endik leh a ni ang," tiin a sawi.

Serie A goal 10 khungtu Ibra a awm a nih chuan Milan tan thlamuanpui tham a ni leh dawn, a tel lo a nih pawhin table hnuai lama awm Torino lakah chuan Pioli naute hi chak zawk tura rinkai an ni ang.

Pathianni zana inlan tur Juventus tan hna a awlsam dawn lo, an mikhual tur Sassuolo hi table-ah pangana ni lai an ni - Old Lady an phak lohna chu point khat chauh a ni hial. Andrea Pirlo naute tan an dinhmun humhim turin chak loh a thiang lo.

A zawna season kua champion thei Juve hian kuminah beisei an la phak lo a, hliam leh hrileng vangin an ṭhat dan berin an khel thei bik lo. Mahse Cristiano Ronaldo an neih avangin an elpui team dang hneh turin an la ṭha tawk.