Mbappe-a'n hmasawn a ngai - Poch

Paris Saint-Germain manager thar Mauricio Pochettino chuan French champion tan danglamna thlen ngei a tum a, a player zawng zawng chu hmasawn turin a duh. Hmasawn tura a duh zingah Kylian Mbappe chu a hming lamrik a ni.

PSG hian hliam vangin Neymar an chhawr thei lo mek a, rawlthar Mbappe chungah mawhphurhna a sang hle. France international hian league goal 12 khung tawhin ani aia khung hnem an awm lo.

Poch chuan, "Player zawng zawngin hmasawn vek se ka duh, a bik takin Kylian pawh nasa lehzuala hmasawn turin ka duh. Kan chak lo a nih chuan kan lungngai tur a ni a, insiamṭhat kan ngaihna lai kan zawng tur a ni ang.

"Tuna ka hmuh dan chuan player-te rilru puthmang a dik thawkhat viau a, chutihrualin hmasawnna tur lai pawh a awm. Hun rei lote chhunga danglamna thlen vak hi a ṭha lo a, team nghet din tur chuan zawimuanga chet a ngai," a ti.

Agrentine manager hian PSG a enkawl hnua a match hmasa berah hnehna a chang zo lo. Zanin dar 1:30 hian Brest an mikhual leh ang.