Haller-a'n Ajax a pan

West Ham player manto ber Sebastien Haller chuan Dutch club ṭha Ajax a zawm a, kum 2025 thleng khel turin contract hi a ziak. Kum 26 mi striker hian Bundesliga club Eintracht Frankfurt aṭangin Hammers hi kum 2019 khan a zawm a, hetihlaia a man zat hi pound maktaduai 45-a ni. 

Mahse, Eintracht Frankfurt tana match 77-a goal 33 khung thei striker hian Premier League club-ah beisei a phak lo - inelna hrang hranga match 54-a khelhsakah goal 14-a khung. 

Dutch club Utrecht tan match 98-a goal 51 lo khung tawh a nih avangin Haller hi Netherlands-ah mikhual lo tura ngaih a ni. 

Ajax lamin an tarlan dan chuan Haller manah hian pound maktaduai 20.2 an inseng a, Hammers hian pound maktaduai 25 chuang an hloh tihna a ni. 

Haller hi tun season-ah khel chhe lutuka sawi tur erawh a ni lo - inelna hrang hrangah match 19 khelin goal sarih a khung a, mahse, a man a to viau avangin fans tam zawkin an duh khawp lo.

Ivory Coast international hralhna man hi Hammers coach David Moyes chuan a hmang thei dawn niin khawthlang media-te chuan an tarlang a, Bournemouth striker Joshua King hming a ri ring hle.

Wolverhampton Wanderers nen pawha sawizawm Joshua hi Premier League-a tlangnel tawh sa a ni a, Bournemouth tan tun season inelna hrang hranga match riat a khelh tawhah goal a la khung miah lo thung.