Zaninah La Liga club lian inlan kim dawn

European football-a league ngaihven hlawh pawl La Liga chu zanin hian khelh chhunzawm a ni dawn a, Spanish club lian Atletico Madrid, Barcelona leh Real Madrid-te an inlan kim vek dawn. 

League hmahruaitu ni mek Atletico Madrid hian zanin dar 8:45-ah Barcelona laka tlawm hlim Athletic Bilbao an mikhual dawn a, Diego Simeone-a naute hi hnehna chang tura beisei an ni. 

La Liga match hnih a zawna hnehna chang tawh Barcelona-in an hnehna chan chhunzawm theih beiseiin Granada an lenchilh dawn a, zan dar 11:00-ah an inkhel ang. 

Real Madrid chu club lian pathum zinga inlan hnuhnung ber tur an ni a, zan dar 1:30-ah Osasuna an lenchilh dawn a ni - anni pawh chak tura beisei an ni. 

Atletico-in La Liga-ah hneh takin hma an hruai mek a, anmahni hnaih bertu Real Madrid aia an sanna hi point hnih lek niin lang mah se match hnihin an khel tlem zawk tih hriat a ṭha. 

Hetihrual hian Simeone-a enkawl team hian Copa del Rey-ah player ṭha an khel nual chungin third division club Cornella an ngam lo a, second round aṭanga tlain an mualpho. 

Los Rojiblancos (Atletico sawina) hi season zawna third division club-in Copa del Rey aṭanga an petchhuahna a ni a, inkhelh zawha Simeone hian rinhlelh theih tak turin ṭawngkam a nei zui. 

Argentine coach hian, "Nakkumah he hmunah hian kan awm leh a nih chuan kan buaina chinfel dan kan ngaihtuah ang," a ti - "Kan awm leh a nih chuan..." tih ṭawngkam a hman hi an la kawi a, chhuak tur anga sawi thawm a ri ring. 

Spanish chanchinbu lian Marca-in thuthar ber a neihah chuan Simeone nghin thu a ni ta lo a, Argentine coach hi a cham belh zawk dawn niin an tarlang leh tawh. Kum 50 mi coach hian a contract ang chuan kum 2022 thleng Atletico enkawl turin hun a nei a, mahse, Marca chuan a contract hi a pawtsei dawn niin an tarlang. 

Hetihlai hian contract ziah lai boruak vela pawimawh ber chu result ṭha a ni a, zaninah Atletico hian hnehna an chang lo a nih ngat chuan Simeone-a contract pawhsei chungchang an sawi hi mumang mai a chang thei. 

Hetihlai hian Athletic Bilbao hi coach thar Marcelino enkawlna hnuaia bul ṭan ṭhat thum an ni a, Barcelona laka an tlawm tawh avangin a zawna tlawm an duh lo ang.

Catalan club ropui Barcelona-in club chhungkua buaina avangin season hmasaah beisei an phak lo a, tun season-ah thawnthu a danglam tam lo. Mahse, La Liga club hian league match hnih chu a zawnin hnehna an chang ve leh tawh a, league table-ah pathumna niin beiseina thar an nei ve leh ta. 

Athletic Bilbao laka 3-2 a an chak ṭumin Lionel Messi-a'n ngai a awh leh ṭan tawh niin a lang a, hei hi Barca tan chuan lawm avanga zuanpui tham a ni - zaninah pawh Messi bawk hi mit fukna tur a ni leh ang. 

Barca boss Ronald Koeman chuan, "Season rei tak a nih avangin champion chiang an la awm lo. Player inhliam an awm thei a, club buaina a awm thei a, beisei ang result awm theih loh hun a awm thei bawk - kawng a la inhawng a ni," a ti a, an elpuite chu talbuai ve thei an nih thu a sawi. 

Tun hnaia Barcelona buaina langsar tak chu thuneitu lamah a ni a, hei hian khelmual lam thlengin nghawng a neiah ngaih a ni - tuna an titi luahtu langsar tak pakhat chu Club President thlan tur chungchang a ni. 

Barcelona hian January-ah Club President hi an thlang dawn a, Covid-19 vangin inthlan hun hi sawn mai tur anga sawi thawm awm mah se Ningani zan khan Barca chuan thuchhuah siamin January 24-ah inthlan a awm tur thu an sawi. 

January 24-a inthlan hi sorkar thuneitu lam chuan Catalan club hi rem an tihsak tawh a, thawm a ri ring tawh hle - langsar tak pakhat chu Messi a ni a, presidential candidate zingah Toni Freixa chu Messi sawisel ngam langsar a ni. 

Barca president lailawk Carlos Tusquets chuan sum inrenchemna ang zawnga ṭawng chuan nipui khan Messi kha lo hralh zawk se an tihfuh tur thu a lo sawi tawh bawk - heng zawng zawng hian player-te a nghawng lo thei lo. 

Real Madrid-in champion beiseina an la nei ve reng a, league match 17 an khelh tawhah point 36 an nei thei - hetihlai hian zanin an inkhel turah erawh coach Zinedine Zidane-a'n a ho thei lo mai thei. 

French coach hian Covid-19 kai a lo hnimhnaih avangin test a nei ve nghal a, mahse, hri erawh a kai lo - hetihrual hian Spain-ah dan khirh tak an nei. Zidane-a nena inhnaih positive hi 'close contact' an tih, hnathawhna/zirna hmuna awmpui emaw, metre hnih vel leka inhnaih chunga minute 15 aia tam an inkawm emaw, medical staff emaw an nih chuan kar hnih chhung a inkhunghran a ngai dawn. 

Mahse, result a negative chuan ni 10 tur a ni thung - he thu buatsaih lai hian Zidane hi a negative tawh tih a chiang a, mahse, inkhunghran erawh a ngaih hmel ta tho niin a lang. Mual sirah French coach hian a naute a lo ho thei lo a nih ngat chuan result-ah nghawng a nei thei ang.