Hliam vangin Chelsea an talbuai

Chelsea manager Enzo Maresca chuan hliam vangin an striker Liam Delap chu December thleng a chawlh a ngaih tur thu a sawi a, kar 10 aṭanga 12 vel tal chu a chawlh a ṭul tur thu Maresca chuan a sawi a ni.

Ipswich Town aṭanga pound maktaduai 30-a Blues pantu hi Fulham nena an inkhelah khan a inhliam a, minute 14 chiah khelmualah hun a hmang hman tihin a malpuiah hliam a tuar.

Maresca chuan, "Tun dinhmunah chuan number 9 kan neih chu Marc Guiu chiah a ni a, Joao Pedro pawh a ṭul chuan number 9-ah a khel thei. Fulham lakah kha chuan Tyrique George kan hmang thung," a ti.

Kum 19 mi Guiu hian season ṭan dawn khan Sunderland chu season khat chhung loan-a khel turin a zawm a, league match hnih a khelhsak hman.

Mahse, Delap a inhliam leh takah chuan Blues hian an kokir leh a ni - Delap hian season hmasa khan Ipswich tan league match 37 khelin goal 12 a khung a, assist vawi hnih a nei.

Hetihlai hian player chhuanvawr Cole Palmer chu khel bawr hliam vangin league match hnih a inlan tawh lo a, Maresca chuan, "Tunah chuan training session a zawm leh tawh a, mahse, a full chuan a la nei thei lo.

"Training kan nei leh ang a, zanina a inlan theih leh theih loh a chiang ang. Hliam dam mek a ni a, game khelh tur kan ngah avangin kan fimkhur erawh a ṭul hle a ni," a ti a, dam ṭha pawh ni se, bul ṭantir nghal kher a tum lo niin a lang.

Chelsea hian zanin dar 12:30-ah league match khel turin Brentford an lenchilh dawn a, September 17, Nilaini zanah Champions League khel turin Bayern Munich an lenchilh zui dawn - Palmer hahdamtir rih hi a finthlak mai thei.

Blues hian tun season-a an league match hmasa berah Crystal Palace chu 0-0 in an inhnehtawkpui a, mahse, match hnih a zawna chak leh tawhin, 5-1 a West Ham an sawp hnuah, 2-0 in Fulham an hneh leh tawh.

Hetihlai hian Blues hian khelmual pawn lamah chanchin lawmawm lo tak hriat tur an nei a, English football-a thuneitu sang ber Football Association chuan kum 2009-2022 inkara agent-te tana dik lo taka sum an hman avangin thubuai 74 a siamsak.

Mahse, Chelsea hian Roman Abramovich-a hnuaia an awm laia an thil tihdik loh hi hai chhuakin, anmahni ngeiin FA hnenah an thlen a, hetiang a nih avang hian hremna hi na lutuk lo pek an ni ve thei.

FA hian Chelsea hi a hrem a nih chuan transfer theih loh, pawisa chawitir emaw, point paihsak emawin a hrem thei dawn a, Blues neitu thar Todd Boehly leh a thawhpuiten, anmahni ngeiin an report avangin hremna erawh a nep deuh a nih pawhin a awm lo hran lo ang.