Korea hnehtu Remsiami telna India

Lalremsiami Hmar hoin India hmeichhe hockey team chuan South Korea 4-2 in an hneh. Women’s Hockey Asia Cup khelh laiah a thiam zual palite an inkhel kual mek - India hian hnehna nen bul an ṭan.

Nilaini zantir lam inkhelah India tan Mizo nula Remsiami hian goal a khung a, inelna neih laiah goal thum a khung tawh - India hian nizan khan China an hmachhawn leh a, result kan hre hman lo thung.

South Korea lakah India tan Remsiami bakah Vaishnavi Phalke, Dangite Kumari leh Rutuja Piscal ten goal khat ṭheuh an khung a, Korea tana Kim Yujin-i goal hnih khungin awmzia a nei phak lo.

Kolasib nula Remsiami chuan, "A tir aṭangin theihtawp kan chhuah a, ram ṭha tak takte pawh kan el phak a ni tih rilru pu chungin tournament kan khel, tunah hian a tawp erawh kan la thleng lo a, hmabak hlen chhuah tur a la awm.

"China leh Japan te hi ram ṭha tak an ni a, hmachhawn harsa thei tur tak an ni. Chutihrualin, keini pawh team ṭha tak kan ni a, kan game pangngai kan khel thei a nih phawt chuan a sang ber kan thleng thei," tiin Vanglaini a hrilh.

Women’s Asia Cup hi a pawimawh, champion tan hmingṭhatna leh sum leh pai chauh a ni dawn lo, a chungnung ber chu Women’s Hockey World Cup 2026 khel turin an tling nghal dawn a ni.

India bakah hian South Korea, China leh Japan te chu a thiam pali zingah an inhlangkai a, an inkhelh kual vek hnuah a sang pahnihten final an khel ang.