City forward Marmoush a inhliam

Manchester City forward Omar Marmoush chu ram tana a fehchhuahnaah a khup a ti hliam a, Pathianni zana Manchester Derby khelh hunah inlan lo thei dinhmunah a ding. Thawhlehni zan khan Egypt leh Burkina Faso te goal awm loin an inhnehtawk a, hliam vangin Marmoush hi minute kuana lekah lakchhuah a ni.

World Cup qualifier-ah hian Marmoush hi minute lina lekah a inhliam a, enkawl a nih hnuah khel chhunzawm mah se a hliam vangin thlak a ngai ta tho. Thlalak aṭanga a lan dan chuan Marmoush-a khup hi a vung a, nimin khan Cairo-ah X-ray hmangin a enfiah a ni a, a dinhmun kan hre hman lo thung.

Kum 26 mi Marmoush hian January thla khan Man City-in Eintracht Frankfurt aṭangin £59mtd-in an lalut a, Pep Guardiola hnuaia hmun pawimawh chang tura ngaih ni mah se beisei angin Premier League-ah a che ṭha nghal lo. Egyptian forward hian season liam ta khan Premier League-ah goal sarih a khung a, tun season-ah goal a la khung lo.

Man City hian derby-ah hliam vangin Mathis Cherki, Mateo Kovacic, Josko Gvardiol leh Savio te an chhawr thei lo chiang tawh a; Philip Foden leh John Stones te dinhmun a chiang lo. Pep Guardiola hote hian match thum khelh tawh aṭangin point thum chauh an la hmu a, table-ah 13-naah an awm.