Santo thlaktu Postecoglou

Nottingham Forest chuan an head coach Nuno Espirito Santo chu an ban a, a hmun ruak hnawh khat turin nimin tlai khan Ange Postecoglou chu inremna an neihpui leh nghal niin khawthlang chanchinbute chuan an tarlang.

Nuno hian season hmasa lawk khan beisei phak baka sang a thlenpui a, tun season erawh Premier League match thum chauh a kaihruai hman.

Portuguese coach hian hmanni deuh khan club neitu Evangelos Marinakis nen an inkar boruak a sawi chhuak a, a hnuah boruak a ṭha chhunzawm thei tawh lo - tunah chuan amah thlaktu tur an inrinsiak chho mek ta a ni.

Forest chuan thlahna thu sawiin, "Nuno hian City Ground-ah thil ṭha tam tak a hnutchhiah a, kan thinlungah hmun pawimawh tak a chang reng tawh ang, a kal zelna turah pawh duhsakna sang ber kan hlan," an ti.

Kum 51 mi Nuno hian kum 2023 December khan Forest hi a enkawl ṭan a, khatih laia an coach chhuak ta Steve Cooper hmun ruak a luah. Season hmasa khan EPL-ah pasarihna a nihpui a, kum 1994-95 hnua an thlen san ber ṭum a ni hial.

June-ah mai khan Forest tan hian season thum daih contract a ziak thar. Amaherawhchu, club thuneitu lam nen an inmil miau loh avangin a tan awm reng theih a ni lo, hna dang a zawn a ngai dawn ta a ni.

Nuno hmun ruak luah thei tur an zawng nghal a, nimin tlai khan Ange Postecoglou nen hian an inrem leh nghal. Season hmasa Tottenham tana Europa League nomawi latu hian team enkawl lai a nei lo, a tan Forest enkawl theihna remchang a ni.

Spurs tana nomawi a chawi hnu lawkah Postecoglou hi ban a ni a, Europa League-ah hlawhtling mah se Premier League-ah 17-na an nih avangin an chelh zui ngam lo, club thar a enkawl a nih chuan North London club laka phuba lak theihna remchang a nei dawn tihna a ni.