Saikhamakawnin chak hmel an hmu ta

GIG Motors MPL12-ah Saikhamakawnin a vawi khat nan chak hmel an hmu a, nimin chhun khan SYS FC chu 2-1 in an hneh. RG Stadium-a inkhelah hian SYS-in Stephen C. Malsawmtluanga hmangin goal khung hmasa mah se Saikhamakawnin an veng tlangval Francis Malsawmkima leh Tlangnuam tlangval Kiran Chhetri hmangin an lehthal.

Saikhamakawn hian hnehna an chan avangin point nga hmuin relegation zone an chhuahsan a, SYS erawh table mawngphahah an la awm thung. Lunglei club hian tun ṭum inelnaah point khat chiah an la hmu a, an kum a la naupan bawk avangin pressure an ngah tawh hle.

Bul ṭan ṭha SYS

MPL12-ah SYS leh Saikhamakawn ten chak ngei an tum ve ve a, ṭan phat aṭangin inkhel a nung hle. Lunglei club zawkin bul an ṭan ṭha a, goal khung tur pawhin hun rei an mamawh lo.

Minute 10-na lekah vei lam aṭangin SYS-in an nawr a, Vanlalramnghaka cross chu keeper RS Lallawmzuala'n nam per mah se a per chu Stephen-a'n changin goal-ah a chantir. SYS-in bul an ṭan ṭha a, point hmu turin beiseina pawh an nei sang hle.

Saikhamakawn an tho

Coach Lalsangzuala Hmar hoten match li aṭangin chak hmel an hmu lo a, pressure an ngah. Result ṭha nei turin 'camp' an nei a, an thawkrim. Nimin inkhelah pawh goal chhuah hmasa mah se chak duhin an goal bawh a na sawt.

Champhai tlangval Malsawmdawngkima'n freekick aṭangin crossbar a pet per a, Saikhamakawnin goal khung beiseina an nei zel. Kimkima'n vei lamah SYS defender Zothanpuia (Zopuia) a tlan pel a, captain H. Lalhumhima (Pepe) position a dik tawk loh bawk avangin Saikhamakawn tlangval hian minute 29-naah siphurh a sut.

Saikhamakawnin minute 39-naah corner kick an hmang ṭangkai a, Dawngkima corner pet chu Kiran Chhetri-a'n goal-ah a chantir. SYS defender Pepe-a'n a veng hneh lo a, Abraham Lalngaihsaka pawhin a pui lo a, Saikhamakawnin hma an hruai leh ta zawk.

Keeper ṭha leh mipui

Saikhamakawnin goalkeeper ṭha RS Lallawmzuala an kawl a, CYMA Football 2025 best keeper hi point an hmuhna kawngah a pawimawh hle. Goal mamawh SYS goal bawh a na a, Stain Lalṭanfela corner kick pet ṭha zet a dan bakah injury time-ah save ṭha bik a nei.

Injury time-ah Hortoki tlangval Zopuia chuan box pawn aṭangin goal-ah kawh zetin a pet a, goal kilah kal mah se RS-a'n a dang hman. Saikhamakawnin ṭantu an nei ṭha a, hun tawp lamah team an au phur ṭha a, an mamawh point thum an hlawhchhuah theih phah.

Coach Sanga hoten point thum an hmu ringawt lo a, relegation zone an chhuahsan bakah semifinal khelh beiseina sang tak an nei nghal. Saikhamakawn hian September 12, Zirtawpniah Mizoram Police an hmachhawn dawn a, hnehna an chang thei a nih chuan a sang pali zingah an awm thei hial ang.