Chak mamawh Saikhamakawn FC vs SYS FC

GIG Motors MPL12-ah vawiin chhun dar 12:00 hian Saikhamakawn FC leh SYS FC te an inkhel dawn a, chak la nei lo team pahnih ni mah se team pahnih hi an nun ṭhat avangin chhun pachangah football hmuhnawm a beisei theih ang.

MPL club thar Saikhamakawn hian I Day Football-ah final lut mah se MPL-ah chak hmel an la hmu lo a, match li an khelh tawhah point hnih chiah an la hmu. Table aṭanga thlir chuan Saikhamakawn hi a hnuai lama awm ni mah se an khelh dan thlir erawh chuan semifinal khel thei tura ngaih an ni.

Coach Lalsangzuala Hmar leh a hoten chak hmel hmuh duhin an thawkrim a, an beisei ang result an hmu thei lo. Vawiin hian table mawngphaha awm SYS FC an hmachhawn dawn a, chak ngei an tum dawn.

MPL12-ah Suanngaihmuana ke a hmui chho ṭan a, match hnuhnung pahnihah goal hnih ve ve a khung. Amuana bakah hian Kiran Chhetri leh Lalnunzira Sailo ten Saikhamakawn tan goal a khung tawh bawk.

SYS lam pawh an insiamṭha hret hret a, match thum chhung point an hmuh loh hnuah match hnuhnung berah Police nen an inhnehtawk. Lunglei club player-te hi an kum a la naupang a, an fitness a ṭha a, Saikhamakawn tan pawh khelh châkawm an ni lo ang.

Chutihrualin SYS hi team nem zawk an nih dawn avangin defender H. Lalhumhima (Pepea) a pawimawh leh dawn a, coach Lalmuankima'n team a rem dik lehzual a ṭul bawk ang. SYS hian MPL12-ah goal thum chauh an la khung a, goal kua ngawt an chhuah tawh. Lunglei club hian tlarhma tihchak aiin tlarhnung tih phui an ngaih pawimawh hmasak ṭul ang.