I League club Chanmari an kal zel

GIG Motors MPL12-ah Chanmari FC chuan nimin khan Kanan FC 2-0 in an hneh a, Rochhingpuia kaihhruaina hnuaiah season bul an ṭan ṭha. Chanmarians hian match li an khelh tawh aṭangin point 10 an hmu tawh a, goal hnih chiah la chhuahin goal an la chhuah tlem ber.

RG Stadium-a inkhelah Laltluangliana leh Joel Lalramengmawia ten Chanmari tan goal an khung a, Kanan FC defender Stephen Lalrinfela hnawhchhuah a nih avangin player 10-in an khel tluan. Chawngthansanga hote khel chhe lo mah se I League club lakah an tihsual vangin point an hlawh chhuak lo.

Goal hnih

Kanan FC-in match hmasa pathuma bul ṭan vek R. Lalruatkima bench-ah an dah a, tlarhma lamah Lalthuthlunga bul an ṭantir bawk. Chanmari pawhin hliam vangin FC Lalhmunmawia an chhawr thei lo a, Lalrinchhana Tochhawng dinpui turin Champhai rawlthar Malsawmsanga Renthlei a rawn lut. Tlarhma lamah Michael Lalbiaksanga a vawi khat nan bul a rawn ṭan a, starting eleven-ah KC Malsawmsanga a rawn kir bawk.

Chanmariin bul an ṭan ṭha a, minute 10-na lekah left back F. Malsawmtluanga freekick vawrhluh chu goal hlauhawm ni lo mah se keeper V. Lalthlamuanpuia leh defender Stephen Lalrinfela te an insu buai a, goal ruakah Tluangliana'n goal hmahruai a khung.

Rochhingpuia hote hian chance ṭha dang pawh nei mah se goal dang khung belh an harsat. Serchhip tlangval Ruatsanga'n player rintlak zawk ni turin goal khung a mamawh a, Kanan FC lakah chance ṭha a hlah tam. Chanmari tlarhma an hriam tawk lo a, player 10-a Kanan an khelh hnuah goal hnihna an khung chauh.

Hun pek belh minute hnihnaah dinglam aṭanga substitute Crespo Vanlalhriatpuia ball dah tawk zet chu bench aṭanga lut tho Khamrang tlangval Joel-a'n ṭha zetin a tauh lut. Chanmariin chak an phu a, chutihrualin goal hmaah an hriam loh avangin nuam sain an chak lo.

Kanan harh a hun

Kanan FC-in match li aṭangin point ruk an hmu a, result ṭha tak ni mah se an elpui team pahnih Dinthar FC leh Chanmari FC lakah an tlawm. Chawngthansanga hoten insiamṭhat an mamawh a, match hnuhnung pathumah goal an chhuah vek avangin tlarhnung tih phui an mamawh.

SYS lakah tlarhnung tihsual vangin goal an chhuah a, an tho chhuak. Chanmari lakah an tihsual nawn leh a, an tho chhuak ta lo. Chawnga hote hi second half-ah an insiamṭha a, goal chance pawh an insiam. F. Lallawmkima leh C. Lalnunsanga (Lansanga) ten goal khung theihna tura ngaihah an tauh lut lo a, box pawn chiaha Lansanga freekick hlawhchhuah chu Lalthanpuia'n a pet over bawk.

Kanan hian September 8, Thawhṭanni hian I League club Aizawl FC an hmachhawn leh dawn a, inpuahchahna hun an neih angte tlarhnung tih phui nana an hman a pawimawh khawp ang.