Mayweather-a WBO title an hlihsak

Weight division hrang hrang pangaa champion lai Floyd Mayweather chu a WBO welter­weight belt kawl lai chhuhsak a ni.

May thla tir khan Mayweather leh Manny Pacquiao te an inhnek a, khawvel ngaihven inhneka chak zawk Mayweather hian Filipino boxer title kawl lai WBO welterweight belt chu a chhuhsak.

Mahse, boxing danah sanc­tioning fee Mayweather hian WBO hnenah a pek a ngai a, a pawisa pek tur zat £128,000 hi July 3 thleng pawha a pek tak loh avangin WBO hian a belt hi an chhuhsak ta a ni.

Mayweather hian a belt kawl lai hi WBO hnenah a thehlut thuai tura ngaih a ni a, a belt kawl lai hlih sak a nih hma hian Mayweather chuan a title kawl ho chu midangin an inchuh ve theih tura hlih mai a duh thu a lo sawi tawh nghe nghe.

WBO thuchhuak chuan, "WBO World Championship Committee chuan ngun taka kan ngaihtuah hnuin Floyd May­weather Jr hi a title kawl lai WBO welterweight champion hlihsak mai loh chu tih theih dang awmin kan hre lo a ni," an ti.

WBA leh WBC welterweight belt la kawl mek Mayweather hian July 20 thleng WBO thutlukna chhanletna hun a nei ang a, hun tiam liam hnuah chuan a sawi buai thei tawh lo ang.

Kum 38-a upa Mayweather hian September 12-ah a hnuhnung ber atan inhnek vawi khat chu a hmachhawn leh tura beisei a ni a, a khingpui tur hming la puang chiang lo mah se American boxer hnek tum hian British boxer Amir Khan chuan thawm a nei ring hle.

Mayweather a welterweight belt kawl lai hi chhuhsak a nih takah chuan American boxer tho Timothy Bradley hnenah champion kawnghren hi pek a ni. Bradley leh Jessie Vargas te chu June 27 khan wleterweight title ruak mai tur inchuh hian an lo inhnek lawk tawh a, Bradley hi chak zawk a nih avangin WBO welterweight champion a ni ta a ni.