ZoFooty Awards 2015 nominees a hriat ta
Nimin tlai khan football ziahna website ZoFooty.com chuan ZoFooty Awards 2015 dawng thei tur player leh coach a tar chhuak a, I League-a tling thar Aizawl FC-in player paruk leh coach an thawh. Nominee zingah CYMA Football leh NECS Cup-a Armed Veng champion puitu coach Lalramchuana chu Mizoram Premier League nena inkungkaih lo awmchhun a ni.
Samsung 3:16 Plan Solution sponsor ZoFooty Awards 2015 ceremony hi July 23, Ningani zan khian Regency Hotel-a neih tur a ni.
Thlanchhuahte ZoFooty Awards hi ṭum thum neih tawh a ni a, 2013 aṭang khan award hi category thuma ṭhen a ni.
Player of the Year (PoTY)-ah Aizawl FC defender Lalramchullova, midfielder David Lalrinmuana leh striker William Lalnunfela bakah Mizoram Police FC leh Chanmari FC winger Lalbiakhlua te chu thlan chhuah an ni.
Coach of the Year nominee-ah Aizawl FC coach K. Malsawmkima, Chanmari FC head coach hlui H. Vanlalthlanga, season thara Chanmari FC enkawl tur Dinthar FC coach HC Zarzoliana bakah Armed Veng Team coach Lalramchuanna te thlan an ni bawk.
Young Player of the Year-ah MFA Registration-a January 1, 1994 leh a hnu lama piang chin player thlanchhuah an ni. Aizawl FC defender Lalṭhakima leh winger Brandon VL Remdika, Chanmari FC forward K. Lalchhanhima leh Chanmari West winger Vanlalbiaa Chhangte te chu Young Player of the Year dawng thei tura thlan an ni.
Mipui an pawimawh
Award dawng tur thlang chhuak tur hi Expert Group (40%), mipui (40%)leh 2014/15 season-a MPL Club (20%)-te an ni. Mipui hian ZoFooty FB Page - Facebook.com/ZoFooty kaltlanga vote tur a ni.
Nominee-te bihchianna
PLAYER OF THE YEAR
David Lalrinmuana, Aizawl FC :
David hian a captain-na hnuaiah Aizawl FC hi MPL3 leh I League second division-ah a champion pui a, National Games-ah Mizoram team gold medal a lakpui bawk.
Lalbiakhlua, Mizoram Police FC/Chanmari FC :
Police winger Biaktea hi MPL vawi thum neih tawha goal ruk khung tling vek thei awmchhun a ni a, MPL3-ah goal kua a khung a, kum zawnin top scorer a ni. MPL-ah Police pathumna a nih pui hnuah I League second divsion khel turin Chanmari FC loan-in a zawm a, goal riat khungin Lonestar Kashmir FC striker Ajay Singh chiah a tluk lo.
Lalramchullova, Aizawl FC :
MPL ṭantirha FC Kulikawn player Lalramchullova kha MPL3 a zawh meuh chuan hmuh hmaih theih a ni tawh lo, best player a ni. Armed Veng defender tel lo hian Aizawl FC tlarhnung a phui tawk lo a, I League an tlinna kawngah leh Mizoramin National Games-a gold medal an lakna kawngah player pawimawh a ni. CYMA Football-ah Armed Veng a champion pui bawk.
William Lalnunfela, Aizawl FC :
2013-14 season-ah William Lalnunfela hi club leh state tana champion theihna zawng zawngah a champion fai vek. 2014-15 season-ah Kolasib tlangval hian record duhawm zawk a rawn nei a; MPL3, I League Second Divison leh National Games-ah a champion. CYMA Football-ah a chenna veng Armed Veng tana inlanin final-ah goal awm chhun a khung a, man of the match a thlan a ni a, match thum lekah goal li khungin top scorer a ni bawk.
COACH OF THE YEAR
H. Vanlalthlanga, Chanmari FC/Mizoram :
ZoFooty Awards siamtirh atanga CoTY nominee-a la tel ziah H.Vanlalthlanga hi ZoFooty CoTY nilai a ni. Season liamtaah khan MFA Super Cup 2014-ah Chanmari FC chu a champion pui a, MPL3-ah erawh Aizawl FC hneh loin champon nomawi an humhim zo lo. I League second division-ah Chanmari FC pathumna a nih pui bawk.
HC Zarzoliana, Dinthar FC/Mizoram/Ramhlun South:
Thlanga ang thoin HC Zarzoliana hi nominee-ah la tel ziah. Zara hian season liamta bul ṭan nan I Day 2014-ah Dinthar FC a champion pui a, MPL-ah erawh pangana an ni. Dr.T.Ao Football Tournament-ah Mizoram team chu semifinal a thlen pui a, Ramhlun South LC team chu NECS Cup 2015 final a thlenpui bawk.
K. Malsawmkima, Aizawl FC/Mizoram :
K.Malsawmkima hi 2013 leh 2014-ah te khan nominee-ah a tel tawh. MPL2-a Luangmual final luhpuitu coach hian Aizawl FC chu I Day 2014 final a luhpui nghal a, MPL-ah a champion pui bawk. National Games-ah Mizoram team gold medal a lak pui a, I League-ah Aizawl FC a hruai thleng bawk.
Lalramchuana, Armed Veng :
Armed Veng coach Lalramchuana hian season hman zawh takah khan club level-ah record nei lo mah se NECS Cup leh CYMA Football-a Armed Veng a champion pui ve ve avangin nominee-a a tel hi awmve rengah a ngaih theih.
YOUNG PLAYER OF THE YEAR
Brandon VL Remdika, Aizawl FC :
Mizoram-in National Games semifinal-a Maharshtra an hneh tumin Brandon VL Remdika hian goal hmahruai a khung a, MPL3 leh I League second divison a Aizawl FC an champion theih nan goal hnih ve ve a khung bawk.
K. Lalchhanhima, Chanmari FC :
Inhliam vangin MPL3-ah K. Lalchhanhima'n a theihna a phochhuak lo a, amaherawhchu Chanmari FC U19 final round hruai thlengtu a ni. Royal Wahingdoh leh Aizawl FC lamah goal pawimawh a khung.
Lalthakima, Aizawl FC :
Khawzawl rawlthar Lalthakima hi player naupang tak nichungin Aizawl FC-in season bul ṭanna tournament I Day Football aṭangin hun pawimawhah an luh tir ngam a; MPL3, I League Second Division leh National Games champion kawngah a thawh hlawk a, a chetṭhat vangin India U19 camp-ah koh a ni.
Vanlalbiaa Chhangte, Chanmari West FC:
Vanlalbiaa Chhangte hi nikum khan nominee-ah dah a ni tawh a, Hriangtlang rawlthar hian MPL3-ah goal li a khung a, Chanmari West FC palina a nih pui. I League U19 qualifier-ah Chanmari U19 tan a khel a, final round khel loin Mizoram tan Dr T.Ao Football khel turin Assam-ah a zin a, semifinal an thleng.
Thlirna Tawi
ZoFooty Awards 2012 (September 27, 2012)
Player of the Year : David Lalrinmuana, Aizawl FC
Coach of the Year : HC Zarzoliana, Dinthar FC.
ZoFooty Awards 2013 (July 16, 2013)
Player of the Year : R. Laldanmawia, Dinthar FC
Coach of the Year : HC Zarzoliana, Dinthar FC.
Young Player of the Year : Jerry Mawihmingthanga, Chanmari FC.
ZoFooty Awards 2014 (August 12, 2014)
Player of the Year : R. Malsawmtluanga, Chanmari FC
Coach of the Year : H. Vanlalthlanga, Chanmari FC
Young Player of the Year : Jerry Mawihmingthanga, Chanmari FC.