Brighton lakah Man City an tlawm

Manchester City-in Brighton & Hove lakah Erling Haaland hmangin goal khung hmasa mah se Seagulls-in James Milner leh Brajan Gruda te hmangin an lehthal. Pep Guardiola hote hian Premier League match thum aṭangin point thum chiah an la hmu a, table-ah 12-naah an awm.

International break zawhah City hian Eithad Stadium-ah Manchester United an mikhual dawn a, Manchester Derby ropui loh ber ṭum a ni hial ang. Pep-a hote top 10-ah an tel pha lo a, Ruben Amorim-a hote tun hnaia an san lai ber niin pakuanna an ni pha chauh bawk.

A fuh ṭep

City hian season bul ṭan nan Wolves 4-0 in an sawp a, game a mawi a tel bawk. Mahse, Etihad Stadium-ah Tottenham 2-0 in an hneh lo a, Pep Guardiola hote an la nghet ṭha lo.

Amex Stadium-ah Rodri-a'n City tan bul a ṭan a, Pep-a hoten first half an thunun. Erling Haaland-a'n a chance neih ṭhat hmasak khung lo mah se a ball tauh pawh Seagulls keeper Bart Verbruggen-a'n a dansak.

Norwegian striker Haaland dan reng theih a ni lo a, Omar Marmoush hnathawh ṭhat rah sengin Man City striker hian minute 34-naah goal hmahruai a khung. Haaland hian Premier League match 100 a khel a, goal 88 a khung tawh.

A fuh leh lo

Pep Guardiola-a'n substition awmze nei a siam ṭhin a, Pathianni zanah erawh Fabian Hurzeler zawkin substitution awmze nei a siam. Second half-ah James Milner, Yasin Ayari, Giorginio Rutter leh Brajan Gruda te an rawn lut a, inkhel kal hmang a dang ta vek.

Ball-in Matheus Nunes kut a per avangin Brighton-in penalty an hmu a, James Milner-a'n minute 67-naah a khung. Seagulls a phur zel a, James Trafford-a'n Jan Paul van Hecke goal khung tur a dan ṭhat zarah City an him zel.

Mahse, minute 87-naah Brighton-in Rutter, Kaoru Mitoma leh Brajan Gruda te hmangin an vaw let a. Subsitute Gruda-a'n inringtawk takin amah vengtu Rayan Aït-Nouri bakah keeper Trafford a bum a, chakna goal a khung. Brighton-in City an hneh a, Pep Guardiola hote buaina belhchhahin a awm.