Spurs player thar Xavi Simons

Tottenham Hotspur chuan RB Leipzig aṭangin attacking midfielder Xavi Simons chu pound maktaduai 51.8-in an la lut a, a contract rei zawng hi, 'hun rei tak' atan tia tarlan a ni a, kum nga tal chu a nih a rinawm.

Chelsea nen pawha sawizawm hlawh hman Simons chuan, "Ka hlim takzet a, inkhelh ka châk tawh hle. Spurs hi club ropui tak an ni a, coach nen kan inhmuh khan ka khelhna tur tih ka hre nghal a ni," a ti.

Spurs boss Thomas Frank chuan, "Kum naupang tak ni chungin tawnhriat a nei ṭha tawh hle," a ti a, kum 22 mi chu a team-in an ṭangkaipui tur thu a sawi.

Netherlands international hian Paris Saint-Germain aṭanga a professional career ṭanin, PSV Eindhoven tan pawh a lo khel tawh a, season hman zawh takah khan Leipzig tan match 33-ah goal 11 khungin, assist vawi riat a nei.

Leipzig tan hian match 78 khel hmanin, goal 22 leh assist 24 a nei a, tun nipui transfer-ah Bayern Munich aṭanga loan-a lakluh Joao Palhinha leh West Ham aṭanga lakluh Mohammed Kudus te chu Spurs-ah hian a zawm a ni.

London club hian Inrinni zan khan Bournemouth mikhualin, he inkhelah hian Xavi Simons hian fan-te chibai a buk - a team thar hi an chak zo lo thung.

Spurs hian Burnley (3-0) leh Manchester City (2-0) hnehin season bul ṭan mah se, Bournemouth lakah 1-0 in an tlawm - Evanilson chuan inkhela goal awmchhun a khung.