Zo Clasico-ah Rinchhana'n Chanmari a chakpui

GIG Motors MPL12-ah Chanmari FC leh Dinthar FC ten football hmuhnawm an chhawp chhuak a, a tawpa inkhel tidanglamtu chu Chanmari captain Lalrinchhana Tochahawng niin I League club 2-1 in an chak. Nimin tlai inkhelah Chanmari tan Lalruatsanga'n hmahruaina goal a khung a, Dintharin R. Laldanmawia hmangin an sut a, 1-1 ni tura ngaih a nih hnuah Rinchhana'n danglamna a thlen.

Round 3 khelh zawhah I League club pahnih Aizawl FC leh Chanmari FC ten point sarih ve ve an hmu a, Dintharin hmahruaihna hun bawhpelhin point ruk hmuin pathumnaah an awm. MPL Round 4 hi September 4, Ninganiah khelh chhunzawm a ni ang.

Dintharin inkhel pawimawhah Danmawia bul rawn ṭantirhin Chanmari pawhin Lalrinchhana Tochawng bul an rawn ṭantir nghal. Club inhal pahnih inhmachhawn a ni bawk a, ṭan phat aṭangin boruak a ṭang hle.

Inkhel ṭang ṭha mah se chance ṭha bik hmuh tur a awm lo a, first half injury time-ah goal luh tur a awm chauh. Aron Vanlalrinchhana leh PC Rosangzuala ten Dinthar tlarhnung ṭhiatin Hnahthial tlangval PC-a cross chu Serchhip tlangval Ruatsanga'n tauh goal ṭha hle.

Second half-ah inkhel a nung chhunzawm a, goal chance a tam hret. Ruatsanga'n box chhungah ṭha takin a lalut a, Vanlalnghaka'n box chhungah titlu mah se referee-in tlu derah an ngai. Darkar khat a ral a, Dinthar hun a thleng. Forward Jerry Lalchhanchhhuaha'n Chanmari defender FC Lalhmunmawia lakah penalty a hlawh chhuak a, Danmawia'n penalty hi minute 62-naah chiang takin a khung.

Team pahnih an inhnehtawk chhunzawm a, Laldampuia kaihhruai Dintharin I League club Chanmari an el tawk. Mahse, Rochhingpuia'n bench aṭangin Lalnunzira a luhtir a, CYMA Football best player corner kick ṭha zet chu Rinchhana'n hun pek belh minute linaah a khung a, 2-1 in Chanmari an vannei.