Aizawl FC-in Saikhamakawn an chelh

GIG Motors MPL12-ah Aizawl FC-in Saikhamakawn an chelh hram a, nimin chhun inkhel hmuhnawm takah I League club leh Lalsangzuala Hmar enkawl team hi 3-3 in an inhnehtawk. Ṭantu nei ṭha Saikhamakawnin Aizawl FC lakah point hlawh chhuak mah se result-ah an lawm lo a, chak tur zawkah an inngai.

RG Stadium-a inkhelah hian Saikhamakawnin bul an ṭan ṭha a, vei lam aṭanga Francis Malsawmkima ball vawrhluh chu Lalnunzira Sailo-in um lutin, minute 10-na lekah goal ṭha bik a khung. Zira goal a mawi a, Suangaihmuana goal a la mawi mah zawk. Minute 17-naah I Day Football top scorer Amuana'n goal pawn chiah aṭangin goal kilah tak a khung.

MPL12-a point la hmu lo Saikhamakawn an khel ṭha a, Kiran Chhetri pawhin AFC keeper Vanlalhriatpuia tan hna a siam. Sanga hote hi an vanneih ṭum ni se, goal thumna khung tur an ni a, AFC defender RH Laltlanhlua'n (Vala) an lamah tilut mah se referee-in goalline pelh hmain a pet chhuak leh hmanah a ngaihsak thung.

Aizawl FC coach R. Lalruatfela'n second half-ah Fela Hlawndo a luhtir a, Lalawmpuia (OmOma) a dah zalen lehzual a, I League club goal bawh a na hle. Khawbel tlangval Zomuana'n minute 61-naah si phurh a sut ṭhen a, Lalrempuia'n box chhungah a kheng ṭha takzet. Minute thum hnuah OmOma cross aṭangin Zomuana'n si phurh a sut zo a, mual ding lamah Vincent Lalduhawma a hmuhnawm bawk avangin chak mai tura ngaih an ni.

Mahse, BVT tlangval Amuana'n minute 66-naah freekick aṭangin goal ropui a khung lehnghal a, Saikhamakawn dinhmun a ṭha leh ta zawk. Goalkeeper Rsa'n Vincent leh Omoma te goal khung tur a dang a, Saikhamakawn 'hero' a ni. Mahse, AFC an tlawm duh lo a, Saikhamakawn tlarhnungin ball pet chhuah an harsat avangin minute sarih hun pek belha minute sarihnaah substitute Lalhruaitluanga ball pet chu keeper RS-a'n a tiper a, Vincent-a'n si phurh a sut. Point khat hmu ve veah Saikhamakawn an ngui a, Aizawl FC an lawm thung.