Saikhamakawn hi zuam chi an ni lo - AFC coach

GIG Motors MPl12-ah vawiin chhun dar 12:00 hian champion lai Aizawl FC leh MPL nomawi chawi ngun ber coach Lalsangzuala Hmar enkawl Saikhamakawn an hmachhawn dawn. Saikhamakawn hian point an la hmu lo a, Aizawl FC erawh table chung berah an awm thung.

I League club coach R. Lalruafela chuan, "Saikhamakawn hi table aṭanga thlir chi an ni lo a, coach ṭha tak an nei a, zuam chi an ni lo. I Day Football-ah kan inhnehtawk a, fimkhur takin kan khelh a ṭul dawn," tiin a sawi. Aizawl FC hian match hmasa berah Mizoram Police 5-0 in an sawp a, SYS FC 3-0 in an hneh leh bawk.

Aizawl FC-in khelh dan nghet an nei chho a, inhliam vang a nih loh chuan player an siksawi mai mai lo. Saikhamakawn lakah pawh match hmasa pahniha bul ṭantu nen an danglam tam lo ang. Coach Sanga erawhin player a siksawi nasa a, AFC laka result nei ṭha turin goalkeeper RS Lallawmzuala dam hman a pawimawh ang.

Saikhamakawnin match hmasa pahniha point an hmuh loh avangin Aizawl FC lakah point hmuh ngei a ṭul tawh dawn a, coach Sanga tan pawh hmabak a harsa dawn. I Day Football-a top scorer Suanngaihmuana'n MPL12-ah goal a la khung lo a, Aizawl FC an hneh dawn a nih chuan Amuana a chet ṭhat a ṭul bawk ang.