Tlai dar 3:00-ah Zo Clasico: Dinthar FC kan hneh ang - Chhinga

GIG Motors MPL12-ah vawiin tlai dar 3:00 hian Chanmari FC leh Dinthar FC te an inkhel dawn a, Zo Clasico hminglem an pek inkhel hi a hmuhnawm dawn. Chanmariin Mizoram Police lakah point khat chauh an hmu a, Dinthar FC erawh Aizawl West Derby-a chak zo hlim niin an phur lai tak a ni.

Chanmari FC coach Rochhingpuia chuan, "Kan theihna anga kan khel a nih chuan Dinthar FC hi kan hneh ang," tiin Vanglaini a hrilh a, I Day Football-ah Dinthar hi 2-0 a an hneh tawh avangin chak tura an inngai hi a mak lo.

Chutihrualin Dinthar hian season bul an ṭan ṭha a, MLS FC leh Kanan FC te hneh ve vein hmahruaitu Aizawl FC nen an point hmuh zat a inang. Kanan FC an hneh ṭumin R. Laldanmawia a khel ṭha a, Sialhawk Express hi Chanmari lakah pawh player pawimawh a ni dawn.

Zo Clasico-a Chanmari lawmna siam ṭhintu MS Dawngliana'n Dinthar kawr a ha tawh a, Bawngkawn forward chuan, "Zo Clasico-ah Dinthar nuih tir ve ka duh tawh," tiin Vanglaini a hrilh tawh a, I Day Football-ah Maimawms lawmna siam thei lo mah se MPL-ah Dinthar lawmna thlentir a tum dawn.

Team pahnih player neih dan thlirin Chanmari squad a chhah ṭha zawk a, I League club-in an chhuahtir Lalhmangaihsanga'n Dinthar FC panin hmun pawimawh a chang nghal. Sialhawk defender Hmangaihsanga hian Chanmari tlarhmaa awm PC Rosangzuala leh Lalruatsanga te hmachhawn a châk dawn.

Chutihrualin Chhinga kaihhruai Chanmari hian starting eleven nghet an nei lo a, an ṭhat dan tur ber an la hre lo. Laldampuia kaihhruai Dinthar lam erawhin an ṭhat dan an hre chho tawh a, Tea Chinzah a dam tawh bawk nen I Day Football-a an hneh loh Chanmari lakah phuba lak ngei an tum ang.